SARDU
Comunu de Carbònia: De gióbia 17 fintzas a domínigu 20 de Meseladàmini 2019 in Carbònia nc’est sa festa de su patronu Gesù Divino Operaio, organizada de Don Giampaolo Cincotti de sa Parróchia de bia Mazzini. “Una proposta stravanada chi dónnia annu donat apuntamentu a unus centu tzitadinus po arregordai “Gesù Divino Operaio” cun unus cantu de afestus tzivilis e religiosus organizaus de una de is parróchias tzitadinas printzipalis, logu de atóbiu, de agregatzioni e sotzializatzioni de una comununidadi manna de fielis” at nau sa Sindaghissa Paola Massidda.
In su cuntestu de is afestus tzivilis si sinnalat sa rapresentatzioni “Una matassa imbrogliata” , chi si fait sàbudu 19 de Meseladàmini 2019, a is noioras de a noti (21,00) in su “Teatro Centrale” de Pratza Roma.
Sa rapresentatzioni dda organizat “La Clessidra Teatro” cun s’agiudu de su Comunu de Carbònia. Is atoris de sa cumpangia teatrali tzitadina, cun sa regia sàbia de Anna Pina Buttiglieri, funt protagonistas de una cummédia spassiosa scrita de Eduardo Scarpetta in napoletanu. Sa stória contat de un’intramassadura de situatzionis e malintesus chi movint de duus amigus gióvunus e bagasseris: Felice e Alfredo. Alfredo sa dí innantis de si cojai cun Erricheta, s’agatat a si depi scosiri de una situatzioni totu trobeddada po non fai sciri custus acontéssius a sa tzia Crescenza, chi dd’iat proibbiu de si cojai.
Una trama trobeddada meda e arrica de situatzionis chi ant a fai spassiai su púbricu .
S’intrada a su “Teatro Centrale” est a indonu.