SARDU

Comunu de Quartu Sant'Aleni: Sighit pustis de su primu fini de cida de apuntamentus s’arressigna “Incanti” in su Nuraxi Diana e in sa Villa Romana, apariciaus de sa DD-events cun sa diretzioni artística e scientífica de s’archeóloga Patrizia Zuncheddu. S’initziativa, chi at promóviu e finantziau s’Amministratzioni comunali e sa Fundatzioni Banco di Sardegna, cun su patrotzíniu de sa Subrintendéntzia Archeológica de Casteddu, at a sighiri fintzas a totu Meseladàmini, cun seminàrius, readings, presentadas e atrus aprofundamentus culturalis, sempri acumpangiaus de abbísitas ghiadas po scoberri is segretus de is duus sítius archeológicus bellus diaderus chi ddoi funt in sa costera cuartesa.

Su programma de custu acabbu de cida biit sàbudu su 5 de Austu in su Nuraxi Diana sa presentada de su libru “Lontano dalle vite rabberciate”, chi at scritu Gianluca Celestino Cadeddu.

S’aprofundimentu literàriu cumentzat a is 7 e mesu de a merii e sighit s’abbísita ghiada in su nuraxi, chi cumentzat a is 6 de a merii (18.00) e chi dda fait s’archeóloga Patrizia Zuncheddu. Is turistas e sa genti de su logu chi ancora no ant abbisitau s’àrea archeológica millenària ddu podint fai fintzas domínigu su 6 de Austu, de is 7 a is 8 e mesu de a merii (19.00 - 20.30).

Domínigu su 6 de Austu, a is 9 oras de a merii (21.00), logu a sa música. In su scenàriu eciseri in is peis de su nuraxi Diana ant a sonai is notas de is ‘Bob Montalbano Swing Bros’. In su palcu Bob Montalbano, boxi, a sa ghitarra e a s’armónica, Alessandro Angiolini a su Sax, Andrea Angiolini a su piano, Vittorio Casula a su double bass e Marco Sotgiu a sa bateria, po unu progetu dedicau a is clàssicus de sa traditzioni jazz e swing, cun sa particolaridadi de is testus originalis, bortaus in italianu, chi pertocant stórias de amori e atóbius romànticus. Una interpretatzioni speciali po fai un’atmosfera eleganti e spassiosa.