SARDU
Comunu de Gùspini: Dedicada a s’Igresienti, “Sardegna Selvaggia” sa puntada de “Linea Verde” de domínigu 19 Gennaxu a Rai Uno.
Su programma Rai sighiu meda bísita una zona de sa Sardigna innui s’ecisu stravanau de sa natura atóbiat costumàntzias antigas de sa messaria e de sa pastoria e logus de archiologia industriali de grandu interessamentu. Is condusidoris Beppe Convertini e Ingrid Muccitelli, cun sa partitzipatzioni de Peppone Calabrese si movint intra de sa zona de s’Igresienti, de Arbus e de Gùspini intra de aziendas agrícolas e scenàrius naturalísticus únicus in su Mediterraneu, a inghitzai de Piscinas e su sistema de dunas cosa sua.
Buggerru, Porto Flavia, Montibéciu funt is scenàrius de innui bessit a luxi s’argumentu stóricu de is minieras de sa Sardigna Sud Otzidentali, innui is minieras prus antigas funt stétias mudadas in logus de memória e de atraida po is turistas. In Montibéciu, chi est stétia sa miniera de prumu prus manna d’Europa, su territóriu portat ancoras is sinnus crarus de is stasonis de bogadura, mancai sa natura a bellu abellu est torrendusindi a pigai su logu cosa sua.
A is peis de su Monti Arcuentu, s’atóbiu cun is pastoris chi portant a innantis sa costumàntzia antiga de s’allevamentu de sa brebei niedda de Arbus. Sémpiri in Arbus, in cumpangia de unu maistu de gorteddus torrat a bessiri a pillu sa sabiduria artigianali de is maistus chi pràtigant cust’arti. In Gonnos, zona chi, a parti sa miniera, at costumau sémpiri a fai messaritzia, intamis si fueddat de ollu, cun s’arregorta de sa “Niedda de Gonnos” – olia de ollu e po papai- e cun sa trabballadura de sa modditzi, unu frutu de sa tupa sarda, de innui si ndi bogat un’ollu benèficu: s’ollestincu.
Sa puntada est cumpletada de sa cosa de papai de sa costumàntzia sarda cumenti a “is supas”, fatas cun su modditzosu, e sa frégula, pietàntzas nàscias de s’avesu modestu de is messajus e bessidas apustis grandu protagonistas de sa coxina sarda.
“Linea Verde” est unu programma de Camillo Scoyni, Nicola Sisto, Giuseppe Bosin, Dario Di Gennaro, Lucia Gramazio, Carola Ortuso e Yari Selvetella.
Regia de Luciano Sabatini. Produtori esecutivu Federica Giancola.