SARDU
Comunu de Nùgoro: Lollove intrat a fai parti de s’élite de “I Borghi Piu' Belli D'Italia”. Pustis de s’averiguamentu fatu me is dis passadas, ariseu su consillu diretivu de s’assótziu ca acollit is centrus italianus piticheddus cun sa punna de ndi salvai stória e traditzionis, at difati nau carei a s’istàntzia presentada a s’acabu de meseidas 2021 de s’amministratzioni comunali.
Su borgu medioevali antigu a 15 km de Núoro at a cumpàrriri in sa Ghia 2022 de s’assótziu in sa setzioni de is Borgus sardus, aciugendusí a Atzara, Bosa, Carloforti, Castelsardu, La Maddalena, Posada e Sàdali. Intra pagu tempus, in prus, a s’intrada de sa biddixedda at a èssiri posta sa cartellonística ca pertocat a s’ arriconnoscimentu de importu mannu, mentris in beranu est prevídia sa cerimónia po donai s’atestau e sa bandiera.
«Lollove – narat su síndigu Andrea Soddu - rapresentat una parti de su tempus passau cosa nostra e est doveri cosa nostra a ddu salvai e avalorai, fadendiddu connòsciri sempri de prus a foras de is làcaras cosa nostra. S’arriconnoscimentu de parti de s’assótziu – sighit su síndigu – amostat ca sa decisioni de donai importu a sa cultura e a su connotu, a sa promotzioni de sa stória cosa nostra e a s’ambienti, est cussa giusta e si cunvincit a sighiri in custa bia».
«Candu eus candidau a Lollove – narat s’assessora cumpetenti Valeria Romagna – fiaus sigurus ca tenessit is recuisius po èssiri postu intra is borgus prus bellus de sa natzioni nostra. Est unu logu innoi si respirat sa stória, unu insediamentu rurali antigu acanta a su cabulogu ca tenit ancora totus is caraterísticas cosa sua. Chi ci ndi fessit abisóngiu, custu atestau s’arregordat ca ndi depeus tènniri a cura e est cussu ca at a fai s’amministratzioni».
S’assótziu “I borghi più belli d’Italia” est stétia fundada in su 2001 cun sa punna de avalorai su patrimóniu mannu de stória, arti, cultura, ambienti e traditzionis ca c’est me is biddixeddas italianas, innoi su prus de cussas arrisultat bogada de is passadas de is visitadoris e de is turistas. Scéti gràtzias a sa promotzioni de custas biddixeddas s’at a pòdiri cumbàtiri su spopolamentu e s’arruina insoru ca ndi sighit.