SARDU
Comunu de Tuili: Su Comunu e sa Pro Loco de Tuili aparíciant po sàbudu 10 de cabudanni sa de dexi editzionis de su wine e food festival “September in Tuili – Percorsi di gusto tra musica vino e arte”. Peri is bias de su centru stóricu de sa bidda, a incarrerai de is oras de is 18.00, s’ant a pòdiri visitai is 10 "locations" sceradas intra de is domus padronalis prus spantosas e de importu cun su pentzamentu de pònniri is binus e is prodotus localis in unu cuntestu de bellesa chentza duda. Sa pensada de sa manifestatzioni est cussa de pònniri impari arti, cultura e enogastronomia sighendu una andada ca andat peri is bias de su centru stóricu proponendu a su visitadori una esperiéntzia ca imboddicat totus is sensus e tenit comenti a chistioni su binu.
Su programma previdit a is oras de is 18.00, in sa sedi de sa Pro Loco, s’abertura de sa billeteria e a cussa at a sighiri a is oras de is 18.15 in su centru stóricu su “Percorso di vini”, abertura de is logus de degustatzioni e stand. In s’interis de totu sa manifestatzioni, comenti andat su percursu, ci ant a èssiri esibitzionis live de is band Musimistici, Luz&Dim e Giuseppe Muggianu & Daniel Theissen. A is oras de is 21.00 sa billeteria at a serrai e a mesunotis, in sa pratza de Villa Pitzalis, ci at a èssiri “Big Mama in Concerto”.
Po informatzionis si podit castiai su situ www.prolocotuili.it