SARDU
MEMORY REMIX
Fonti: Comunu de Gùspini
In su cuntestu de su progetu “Memory Remix” a incuru de NoceFresca, s’artista e fotografa Chiara Caredda est in Gùspini de su 15 fintzas a su 30 de Cabudanni e fait unu trabballu asuba de sa memória de is abbitantis.
Po custu s’organizatzioni est pregontendi a is abbitantis de Gùspini de cumpartziri is arragodus cosa insoru, imprestendi fotografias bécias chi si podint intregai in sa Biblioteca Comunali ( si podint arretirai sémpiri in Biblioteca, apustis de calincuna dí: giustu su tempus po ddas scannerizai) o intreghendi is negativus po arriciri fotografias imprentadas de bellu a nou imparis cun is negativus chi benint torraus.
De sighiu torraus a portai is istrutzionis minudas aici cumenti ddas pubricat su giassu nocefresca:
Istrutzionis de intregadura:
Is fotografias e/o is negativus tocat a ddus intregai in una busta serrada chi a foras depit portai scritu nómini, sangunau e númunu de teléfunu.
Is fotografias e is negativus podint essi in biancu e nieddu o a coloris, si fait de innantis de su 1970.
S’artista pregontat de acumpangiai a is fotografias una fràsia pitichedda ( scrita a palas de sa fotografia o unu billetu de acumpangiamentu) Sa fràsia podit essi descritiva ( es. babbu e mamma in su 1950) o torrai a portai un’impressioni pessonali ( es. mi praxiat meda andai a su mercau cun ajaja).
Logus, dís e oràrius de intregadura
Is bustas tocat a ddas intregai in sa Biblioteca Comunali su 11, 12, 13, 14 e 15 de Cabudanni segundu s’oràriu chi sighit:
martis, gióbia e cenàbara: 8,30 – 13,00/ 15,30 – 18,30 ( de is otu e mesu de a mengianu fintzas a sa una e de is tres e mesu fintzas a is ses e mesu de a merí);
mércuris : 15,30 – 18,30 ( de is tres e mesu fintzas a is ses de a merí)
sàbudu: 9,00 – 12,00 ( de is noioras de a mengianu fintzas a mesudí).
Po intregai is fotografias a foras de custu oràriu e de custas dís e po atobiai de pessona s’artista, si podit tzerriai a is númunus de teléfoneddu: 340. 2640505 e 347.9849647 o mandai una “e-mail” a: info@nocefresca.it
Ita manixu si fait de is fotografias?
Is fotografias ddas scansionat o ddas torrat a fotografai s’artista. Su meri podit arretirai sa cópia originali o su negativu apustis unas cantu dís chi ddas at intregadas, a incumentzai de su 24 de Cabudanni, sémpiri in sa Biblioteca Comunali.
Cun is immaginis scannerizadas o torradas a fotografai, s’artista fait trabballus umperendi pruscatotu sa ténnica de su “collage”.
Sighi totu su contu de su progetu “Memory Remix” in “Facebook” e in “Instagram”! “hastag” de arrelau: #memoryremix_guspini.
Sceras asuba de s’artista
Chiara Caredda nascit in Crabónia in su mesi de Làmparas de su 1992. Crescit in Sant’Antiogu e si càmbiat a Casteddu innui stúdiat ande sa facultadi de Líteras e Filosofia, in su cursu triennali in Benis Culturalis, indiritzu stóricu – artísticu.
Amantiosa, giai de piciochedda, de s’ arti e de sa música, atobiat sa fotografia in s’interis de unu labboratóriu scolàsticu. In pagu tempus sa fotografia bessit s’interessamentu principali cosa sua e in su 2014 abbitat sa scola de fotografia analógica de S’Umbra, in Casteddu. In su 2015 bessit assistenti de càmera oscura e fait unas cantu letzionis de ténnica fotogràfica e camera oscura.
In s’interis de custus annus su tràgiu fotogràficu cosa sua pigat forma e si difinit, caraterizendusí pruscatotu po s’umperu de sa pellícula in biancu e nieddu e de su “collage” analógicu.
In is úrtimus annus at pigau parti a unas cantu ammostas colletivas e in su 2017 at tentu sa primu pessonali cosa sua, ande su stúdiu “Mezzopiano” de Casteddu.