SARDU
Comunu de Gùspini: De sàbudu su 9 de Meseargiolas 2022 si podit bisitai torra sa Mena de Montibéciu in su cantieri de levanti pustis de su pàsiu po mori de su covid chi at postu barrancus a dda biri.
Cumenti si ligit in su comunicau de sa “Lugori scarl” chi at bintu sa cuntzessioni de su servítziu po 6 mesis.
"Duus annus e cuatru mesis giustus giustus funt passaus de s’úrtima dii chi s’est pótzia bisitai sa Galleria Anglosarda e s’Ex Diretzioni Minerària (connota puru che a Palàtziu Sanna Castoldi) cun sa famada “Sala Blu”.
De sa serrada impónnia de su Guvernu cussu 09.03.2020 disgratziau po mori de sa crisi epidemiológica de Covid-19, seus lómpius a su 09.07.2022 po tenni torra bisitàbbili custa parti de sa Mena de Montibéciu, su giassu turísticu-culturali stravanau stichiu in mesu a is baddis de levanti e de ponenti chi nci àrtziant fintzas a Monti Arcuentu e ndi calant fintzas a su pranu de su Campidanu e a sa Costa Birdi.
Imoi nci seus e cun custas duas prendas torrant a cumentzai puru is bísitas de is tres cammineras de “S. Antonio”, “Officine” e “Piccalinna”, chi si funt fatus a su própiu in custus úrtimus annus de “Covid”, mancai a manera prus simpli meda.
Sa stória de custus logus est alliongiada a is millas e millas trabballantis chi, gràtzias a s’idea abista chi iat tentu su tataresu Giovanni Antonio Sanna, iant agatau una vida mellus, e prus de una borta sa morti puru. Una stória chi acostat a pari sardus meda e ddus acomunat a atras personas in Itàlia e in su Mundu. Atrus minadoris che a issus. Sa sardidadi de sa Mena de Montibéciu s’at donau e si donat oi ancora importu mannu e s’agatat a su primu postu in su panorama mineràriu mondiali. Giai ca est stétia sa prus manna de totu Europa in sa bogadura de su prumu. E is annoaduras tecnológicas no fiant ogualis in nisciunu atru logu. Poita mineralis rarus e bellus cumenti is nostus no si ndi funt bius mai e si dda faint torrai a agatai in is museus de stória naturali de totu su mundu e in dónnia libru specializau. Chini dda bísitat arrennescit a bisai s’epopeja tecnológica e industriali rivolutzionària chi fiat spainada in Sardigna in sa metadi de s’Otuxentus e fintzas a sa Segunda Gherra Mondiali. Poita si podint bivi speriéntzias stravanadas asuta de terra, camminendi aintru de una galleria bera, ma fintzas apitzus de sa terra, intra is medas fàbbricus chi dexi de custus funt musealizaus, spainaus in centu e prus ètarus ingiriaus de padentis.
Si ingrúxant is didus e si torrat a cumentzai cun atrivimentu sa marrania faci a una Tèmpora Turística chi in su Campidanu de Mesu fait fatiga a torrai a partiri, innoi prus che is atrus logus. Fintzas po custu fiant in medas is chi fiant domandendi de torrai a aberri su giassu turísticu-culturali de Montibéciu, tarea o passàgiu de milla e milla biaxadoris a trevessu peri sa Sardigna.
Bastit chi si fetzat sa prenotatzioni is bísitas si podint fai dónnia dii, siat a mengianu e siat a merii, ma faci a sa metadi de Austu is aberturas s’ant a cresci, a manera de permiti a totus, fintzas chini lompit a s’úrtimu, de ndi gosai. Is cuntzessionàrius de sa Mena de Montibéciu ant crésciu puru is Servítzius In-Línia (www.minieradimontevecchio.it), po permiti a totus de comporai a sa sola is billetus, ma abarrant a disponimentu po dónnia netzessidadi fintzas in su númeru sólitu 3384592082.
Pustis de duus annus de abetu podeus torrai a gosai de Montibéciu in totu s’ammàinu suu!”