SARDU

Comunu de Aressa: Fonti: "La gazzetta del Medio Campidano": 

Unu programma arricu de atòbius finas a s’acabbu de s’annu gràtzias a su Comunu e a sa Pro loco. Sàbudu su 2 de argiolas fotogràfias e cuncertu de sa banda musicali de Ales. Teatru, mùsica, saboris e prodotus de su territòriu. Ma puru atividadis po abarrai impari. «Puru sa populatzioni nosta tenit gana de si atobiai apustis de duus annus de pandèmia e po custu eus organizau unu programma arricu de atòbius finas a s’acabbu de s’annu». Aici ant nau su sìndigu de Baressa Mauro Cau, su vitzesìndigu Mirko Pisu e su presidenti de sa Pro loco Ulisse Corona presentandi su cartelloni de is initziativas, chi ant a allirgai in custus mesis e finas a meseidas sa comunidadi pitica de sa Marmidda. Unu acòrdiu intra amministratzioni comunali e assòtziu turìsticu locali po organizai giorronadas e eventus, po acuntentai totu is biddajus, de dònnia edadi. «Eus a sighiri finas a Paschixedda e a s’ùrtimu de s’annu cun mùsica e spàssiu totus impari>, ant fatu sciri is amministradoris de Baressa e su nùmuru unu de sa Pro loco “Sa Mendua”.  Su presidenti de su Cunsòrtziu Due Giare Lino Zedda at aciuntu: <Una amostadura de vitalidadi po contu de unu de is trexi comunus nostus. Su territòriu diventat prus arricidori puru cun initziativas cumenti a custas». A pustis de su sucessu de sa serada de teatru organizada de is atoris de sa cumpangia teatrali “Tragodia” de Mògoro immoi tocat a sa cultura, de su ballu e de sa mùsica. Sàbudu su 2 de argiolas a is ses de a merì in sa pratza de su Comunu ddoi at a essi s’incingiadura de sa sigunda mustra de su progetu “Fotografia Contemporanea in Marmilla” de su Cunsòrtziu Due Giare e de s’assòtziu “Su Palatu Fotografia”. Ant a essi amostadas is fotografias de sa fotògrafa giòvuna Marianna Ogana, chi at passau unus cantu de cidas in sa bidda de sa Marmidda e cun is fotografias chi at fatu s’at a arregallai una visioni originali de is atividadis traditzionalis de Baressa acapiadas a s’agricultura intra passau e benidori. A s’inauguratzioni ddoi ant a essi su sìndigu Mauro Cau, su presidenti de Due Giare Lino Zedda, su presidenti de “Su Palatu Fotografia” Salvatore Ligios, sa fotògrafa Marianna Ogana e sa curadora de su progetu Giulia Aromando. Sa mustra s’at a podi bisitai finas a su 2 de mesi de ladàmini 2022. A pustis unu murzu su cuncertu de sa banda musicali de Ales, sighida de su maistu Luca Mangini, in pratza de sa Paxi, connota puru cumenti a pratza de Padre Pio. Domìnigu su 10 de argiolas una giorronada dedicada a sa siguresa in mari in s’arena de su Poetu po is pipius e is famìlias organizada in collaboratzioni cun sa Cruxi Arrùbia- Croce Rossa.  Is seradas de s’istadi in Baressa aprontadas de su Comunu e de sa Pro loco ant a sighiri cun su tzìnema in pratza e cun is festas de su connotu cumenti a cussa de Santa Maria Atzeni e in cabudanni cun sa sagra de sa mèndula, in sa de bintinoi editzioni e cun novidadis medas. In atòngiu gitas po totus, traditzionis, tastaduras de ollu, girus in bicicleta, tastadura de castàngia e de bruschetas (pani arridau cun ollu e tamàtiga). Is datas ddas depint ancoras detzidi. Atòbius medas po festegiai sa Paschixedda e s’annu nou puru cun d-unu cuncertu mannu. «Seus prexaus meda de custu programma», at serrau su sìndigu Cau, «spereus chi partetzipit genti meda puru is chi bivint me is biddas acanta».