SARDU

Comunu de Gùspini: De su 5 de Meseargiolas a su 13 de Austu s’istadi de Gùspini at a essi alentada una borta ancora gràtzias a spetàculus, atóbius e dibatas abertus a totus. Is acontéssius ddus organizat su Tzentru Cummertziali Naturali de Gùspini, paris cun sa Regione Autònoma de Sardigna, su Comunu de Gùspini, sa Proloco e is assótzius de su territóriu.

Funt medas is apuntamentus in programma, e atrus no funt definius ancora, po un’arressigna chi est unu puntu de riferimentu de importu de s’istadi de su Campidanu de Mesu. “Ocannu eus bófiu donai una bistimenta noa a un’apuntamentu chi no amancat mai in s’istadi guspinesa”, faint sciri cussus de s’oganizatzioni, “Notti Rosa e Azzurre”, s’at a acumpangiai totu s’istadi, cambiendi spertus de su setori turismu, artistas, musicistas e s’apuntamentu chi no podit amancai cun sa Corrida guspinesa, chi dónnia annu fait aproliai púbblicu meda e turistas chi benint po abbisitai su territóriu nostu in ocasioni de Sa festa Manna”.

Su programma

5 de Meseargiolas

Su primu apuntamentu de s’istadi guspinesa est mércuris su 5 de Meseargiolas a is 9 oras de a merii (21.00) in pratza XX Settembre cun s’atóbiu intitulau “L’economia e il Turismo Insula”: is protagonistas funt Federica Caria (cummertzialista, manager de arretza e presidenti “Confcommercio Green” de sa circoscritzioni territoriali Campidanu de su Sud Sardigna, delegada po Casteddu de ASSORETIPMI, s’assótziu chi promovit e insutzúligat is arretzas de siendas), Ivonne Concu (imprendidora, sperta de Economia Manageriali, fundadora de Sardinia Destination Weddings a su servítiziu de is professionistas de sa coja) e Sandro Usai (fundadori de Ablativ, spertu de turismu, atzessibilidadi e comunicatzioni istitutzionali púbblica). A fai pretziosu su merii su duo “Menestrellafemminista” chi ddu cumponit Nicoletta Salvi (boxi, ghitarra e organetu) e Antonio Merola (boxi e percussionis), chi s’impegnat a spainai is sonus de sa música populari de su tzentru e sud de s’Itàlia.

12 de Meseargiolas

Sgheus mércuris su 12 de Meseargiolas, a is 9 oras de a merii (21.00), sempri in su própiu palcuscénicu cun sa presentada de su libru “La signora dell’anello - Memorie di un antico gioiello” (editzionis Della Torre, 2023), con s’autora Ada Lai, acostiada de sa scritora e poetessa (Fémina Sarda 2023) Iride Peis e de su giornalista Giovanni Scanu (L’Unione Sarda). At a partetzipai a s’acontéssiu su Maistu Marcello Floris, musicista e ghitarreri.

19 de Meseargiolas

Is apuntamentus torrant mércuris su 19 de Meseargiolas a is 9 oras de a merii (21.00), in su palcu aprontau in pratza Don Michele Pinna (giai Sa Piscedda) po un’atra presentada editoriali interessanti de su “scritori de s’ànima” Davide Forte e su libru suu “Storie da un altro mondo” (Editzionis Parallelo45, 2021), òpera dedicada “a totus cussus chi, mancai si perdant, scínt agatai su modu, sa fortza e su coràgiu de torrai.” Sa stória contada est cussa de Leonardo, giornalista de orígini sarda, ma chi s’est fuiu a giovuneddu de s’ísula circhendi de si lassai agoa su passau suu. Una dii agatat in s’ufítziu cosa sua unu dossier cun unus cantus artículus chi contant is fainas de una famíllia de piscadoris, acadéssias giai prus de bint’annus, e custu fait cambiai sa stória.

Ant a acumpangiai sa presentada Emma Forte e Alberto Atzori a sa ghiterra.

26 de Meseargiolas

Mércuris su 26 de Meseargiolas, a is 9 oras de a merii (21.00), in bia Don Minzoni, acanta de sa “Galleria dei Sapori” si fait sa dibata “Innovazione digitale e energetica: dalla Blockchain al Metaverso. L’impatto socio-economico”, cun William Nonnis (Full Stack & Blockchain Developer innantis po su Ministeru de sa Defensa e imoi in ENEA), Mariella Vacca (dirigenti scolàsticu de s’I.I.S. “A. Volta” de Gùspini-Arbus-Biddacidru) e Maurizio Onidi (giornalista e visu-diretori de sa “Gazzetta del Medio Campidano”).

Is apuntamentus de Austu no funt ancora definius ma est siguru ca su 13 de Austu in pratza XX Settembre, a is 9 oras de a merii (21.00), si fait sa Corrida Guspinesa, aberta a artistas, cantadoris, cómicus, ballerinus e diletantis “allo sbaraglio”. S’acontéssiu est organizau paris cun s’Assótziu Afestamentus Santa Maria Assunta. Po informatzionis e po si prenotai a partetzipai a is acontéssius tocat a tzerriai a su númeru 3402449376.