SARDU
Comunu de Orzai: In ocasioni de is 130 annus de nàscida de Carmelo Floris (1891 – 1960) torrant in Orzai is grandus manifestatzionis artísticas cun sa de 3 editzionis de s' Ammosta Biennali de Intzisioni Italiana. Sa rassigna est inghitzada su 24 de Argiolas 2021 in sa domu setecentesca de Carmelo Floris, innui est stétia incingiada s'ammosta colletiva a sa preséntzia de sa Síndaga Maria Maddalena Agus e de s'Assessora A sa Cultura Emanuela Piras e de is diretoris artísticus de sa biennali Enrico Piras e Marzia Marino.
A parti sa partetzipatzioni scontada de is artístas sardus: Piero Barranca, Franco Bussu, Claudia Cabras, Giovanni Dettori e Nicolino Sirigu, esponint puru unus cantu xilògrafus de fama internatzionali chi ndi benint de continenti: cumenti a: Malgorzada Chomicz de Perúgia e Marcella Miranda de Chiaravalle. Funt binti is artístas cumbidaus a sa de 3 Ammostas Biennalis de s'Intzisioni Italiana po si cunfrontai asuba de sa técnica de sa xilografia chi, in s'interis de su Noixentus, at sodigau in Sardigna livellus de primori cun is òperas de Giuseppe Biasi, Mario Delitala, Stanys Dessì e Carmelo Floris, scéti po arremonai calincunu de is grandus Maistus sardus, interpretis originalis de s'arti intzisória.
"S'ammosta colletiva – narat sa stórica de s'arti Marzia Marino – presentat a su púbblicu is òperas fatas po sa rassigna chi lassant a biri linguàgius espressivus diferentis, a bortas traditzionalis e àteras innovativus meda. Is artistas si movint intra de su linguàgiu figurativu e s'astratzioni, fadendi trabballus arricus de arrelatus, chi cumbidant s'osservadori a non si firmai a s'apariéntzia; giogant cun sa luxi e cun is riflessus po contai paesàgius arricus de particularis opuru cun particularis apenas acinnaus asuba de sa linna. Unus cantu abarrant acapiaus a sa memória e a sa stória de s'intzisioni, e in su tema e in sa técnica, faint trabballus chi funt un'atu de respetu faci a is grandus Maistus de su passau: in is òperas insoru, Ómini e Natura certant po su primatu, cun incuadraduras fatuvatu de intensidadi espressiva forti, chi donant boxi a su sotziali o sa fidi religiosa sintzilla; àterus faint logu a is flussus de sa cusciéntzia, sa muda sighida de sa matéria, scoviant scenàrius esotéricus, míticus e antigus. Síntesi, echilíbriu e essentzialidadi si acostant a is labbirintus introbeddaus de sinnus o a su decorativismu pretziosu de chi,cun virtuosismus prepotentis de su bulinu e de sa sgúbbia, stentat asuba de sa matrici. Asuba de totu, acabbat Marzia Marino, dòminat sa passioni e s'amori po un'arti, sa de sa xilografia, capassa in di de oi puru de creai contus fundudus de s'ànima".
Sa de 3 Biennalis de s'Intzisioni Italiana - Carmelo Floris dda organizat su Comunu de Orzai cun s'agiudu de su "Consorzio Bim Taloro", "Banco di Sardegna S.p.a" e "Unione Comuni della Barbagia" e s'agiudu prestigiosu de su Ministeru de sa Cultura e de sa Presidentzia de su Cuntzillu Regionali e sa collabboratzioni de sa "Associazione Nazionale Incisori Contemporanei".
Sa Biennali de s'Intzisioni Italiana nascit in su 2021 de sa proposta de Enrico Piras cun sa tarea de arremonai sa figura e s'òpera de su grandu pintori e intzisori Carmelo Floris e de prumovi in su mundu s'immagini de sa Sardigna e su territóriu de sa Barbàgia.
Is artistas chi partitzipant a sa manifestatzioni, cun cumbidu spetzíficu de su Comunu de Orzai, ddus scerat sa diretzioni artística. Su comitau scientíficu, formau de is diretoris Enrico Piras e Marzia Marino e de is spertus Maria Luisa Frongia e Nicola Micieli, tenit su cómpitu puru de curai is scritus de su càlogu de s'ammosta e de intregai su "prémiu-còmpora" po dónnia autori, chentza de fai una graduatória de méritu.
Is abbisitadoris de s'ammosta colletiva de sa de 3 Biennalis de s'Intzisioni italiana podint ammirai, in prus de totus is òperas de sa de 3 Biennalis, puru sa colletzioni permanenti de sa Domu Carmelo Floris de Orzai.
Po sceras e prenotatzionis de is abbisitas ghiadas a sa de 3 Ammostas Biennalis de s'Intzisioni, chi sa Sotziedadi Eikon de Nùgoro at ammaniau in sa Domu Museu Carmelo Floris, tocat a cuntatai s'assistenti museali Lidia Siotto de sa "Cooperativa Agorà Sardegna".
Tel. 366.46.25.022
e-mail: museocarmelofloris@gmail.com
Po àteras sceras asuba de sa Biennali castiai su giassu de su Comunu de Orzai innui ddoi at una pàgina dedicada a s'Ammosta Biennali:
https://www.comune.olzai.nu.it/.../tzente/pagine/incisioni