SARDU

Comunu de Pabillonis: Fonti: "La Gazzetta del Medio Campidano": Festa de Sant’Antoni de su fogu in bidda cun is ritus religiosus sceti. Po mori de su Covid, is manifestatzionis traditzionalis cun is símbulus suus de importu chi acumpangiànt sempri sa festa de Santu Antoni de su fogu, festa chi is pabillonesus funt apegaus meda, ocannu no si faint.  

Su cíxiri coxinau cun croxolu de procu, is malloreddus e sa petza arrustia chi atrus annus passaus si funt sempri cumpratzius ananti de su fogadoni, s’artefítziu e sa música chi allirgànt su merii de sa festa, ocannu no ddoi funt, po mori de sa pandemia chi, pruschetotu in custu mesi de Gennàrgiu, s’est spainada meda in bidda.

“Giai ca seus un’atra borta ancora sinnaus de sa crèscia de is apestaus e asuta de is dispositzionis noas po gherrai su covid 19, sa festa de Sant’Antoni de su fogu ocannu si fait cun is apuntamentus religiosus sceti, abetendi de torrai assélius, in saludi e in paxi cun s’agiudu de su Santu”, at comunicau su predi don Luca Pittau in su follu de sa cida cun is apuntamentus e is programmas religiosus chi si donat in crésia a is fidelis.  

Su programma de sa festa de Sant’Antoni de su fogu biit, difati, is ritus religiosus de sempri:  sàbudu su 15 de Gennàrgiu, a is 5 de a merii sa Santa Missa in onori de  Sant’Antoni de su fogu, sighit sa beneditzioni de su pani chi si donat a is fidelis candu acabbat sa missa. Domínigu su 16, missas a is 8 e a is 10 de a mengianu. Lunis 17, dii de sa Festa de Sant’Antoni de su fogu, a is 5 de a merii, Santa missa in onori de su Santu e beneditzioni de su pani giau de su cumitau.

Po sa primu borta su fogu, símbulu de sa traditzioni religiosa e alliongiau a su Santu amparadori de su fogu, no s’alluit. Sa festa, chi at a biri fata sa Missa sceti, chentza de sa prucessioni cun sa stàtua de su santu peri is bias de sa bidda, e chentza de sa beneditzioni de is animalis de domu, de su pani, de su cíxiri coxinau cun croxolu de procu, de is macarronis, símbulu de generosidadi alliongiadas a sa traditzioni popolari, e chentza de su fogadoni, chi biiat sa genti a cambarada totu a giru de su fogu beneitu, at a èssiri una festa de prus pagu importu po sa genti de Pabillonis. S’importu de custa festa religiosa e profana a su matessi tempus, in sa bidda, in is annus passaus (Gennàrgiu 2008) iat biu puru sa participatzioni de un’óspiti diversu de is chi ddoi funt normalmenti: s’Obispu de Abas Mussennor Giovanni Dettori. Pròpiu s’Obispu, acumpangiau de su predi Luca Carrogu e de su síndigu Marco Dessì, iat benedixu su fogadoni de Sant’Antoni e fiat abarrau in mesu a sa genti cumpartzendi cun issa is costumus antigus e is momentus de vida comunitària.