SARDU
Comunu de Pabillonis: S'Amministratzioni Comunali e s'Ufítziu de Língua Sarda de Pabillonis, tenint su prexeri de strangiai a Prof. Emilio Ortu Lieto* chi presentat su líbburu cosa sua:" "Pitture decorative nelle case di terra in Sardegna".
Sa presentada si fait cenàbara 24 de Maju 2019, a is cuatru e mesu de a merí (16,30), in is aposentus de sa Scola Média bécia, in bia Sardigna, in su cuntestu de su cursu de alfabbetizadura de Língua Sarda. Podint partitzipai puru is chi non funt iscritus a su cursu e is chi non funt residentis in Pabillonis.
Su cursu de Língua Sarda ddu organizant sa Províntzia de su Sud Sardigna imparis cun su Comunu de Pabillonis, alleaus in su progetu "Sighidura de sa sperimentatzioni linguística" cunformas a sa L.482/99 "Normas in materia de amparu de is minorias linguísticas stóricas".
S'autori
Emilio Ortu Lieto nascit in Casteddu su 16 de Maju de su 1963, si laureat in Padova in Psicologia de Comunidadi e in Venetzia in Scenografia e costumu; trabballat prus o mancu de 25 annus in su teatru e in su tzínema, trabballendi a bortas cun prémius Oscar e nóminis famaus internatzionalis, siat cumenti a costumista e scenografu siat cumenti a assistenti. In is úrtimus dexi annus, apustis de essi torrau in Sardigna, in prus de insenniai, si ocupat de formatzioni e spartzinadura de is tintas naturalis, de contrastória de su costumu teatrali e is poéticas cosa sua e de sa relata intra de is connoscéntzias costumadas e identidadi.