SARDU

Comunu de Gùspini: Su Comunu de Gùspini organizat un’atóbiu cun is studiantis de sa scola elementari chi, su 24 de Maju a mengianu, andant a is giardinus púbricus po ddus cambiai in unu laboratóriu a celu abertu.

Po médiu de giogus, cantzonis, arrexonamentus personalis e ammostadura de cartellonis, is pipius de is cràssis 3^, 4^, 5^ aprofundant s'argumentu de su svilupu de profetu e de s'amparu de sa biodiversidadi. Funt is studiantis chi cun is trabballus cosa insoru, spricant calis funt is càusas printzipalis de pérdida de sa biodiversidadi, de sa sdorrocadura de is "habitat", a s'intrada de is arratzas invasivas allenas, a is cambiamentus de su clima, a s'incuinamentu de pràsticas e de partixeddas  de pràstica de s'ecosistema marinu, proponendi is pràtigas bonas de adotai.

Sa proposta  est stétia organizada in cumbinatzioni cun s'acontéssiu de serrada de su progetu comunali: "A cassa de allenus", unu progetu de comunicatzioni chi nascit pighendi a modellu unu progetu europeu: “ Life Asap”. Su Comunu de Gùspini  est ambasciadori de custu progetu chi punnat a sensibbilizai is studiantis asuba de is perígulus acapiaus a sa spartzinadura de is arratzas allenas, chi funt sa càusa de pérdida de sa biodiversidadi in scala  mundiali.