SARDU
Comunu de Pauli Gerrei: Cenàbara 12 de Abrili, a is duas e mesu (14,30) in su Tzentru Polifuntzionali de Pauli Gerrei, in bia Pertini, nc'est sa presentada de is arresurtaus de su progetu "Sa Biblioteca de s'Identidadi", organizau de is Amministratzionis Comunalis de Ballau e de Pauli Gerrei e progetau e cordinau de s'assótziu culturali "Malik" . Sa proposta, inghitzada in Meseladàmini, s'est cumprida in su giru de ses mesis e at interessau 40 studiantis de s'Istitutu Cumprensivu Statali "Edmondo De Magistris" chi ant partitzipau a fai una libreria de sa memória. Partendi de is contus de is ajajus e de is antzianus, de is líbburus e de is videus documentàrius, is pipius ant creau is líbburus e sa libreria cun lana de brebei sarda e materiali giai umperau. Su labboratóriu pigat a modellu su métodu Bruno Munari chi narat chi su pipiu, in s’imparu, si ascurtat scarescit, si bit arregordat, si fait cumprendit. In manera spassiosa, creativa, diferenti e ligera is studiantis ant fissau e fatu cosa insoru cuntzetus didàticus de importu e pretziosus, sarvendi in su matessi momentu sa memória de totus.
Sa libreria tenit sa forma de una mata seculari, su làndiri, chi simbolizat sa stória de Ballau e de Pauli Gerrei: is arreixinis rapresentant su passau, is cambus is argumentus afrontaus e dónnia follixedda su benidori, est a nai is pipius etotu.
Su trabballu artísticu e de circa de is piciocheddus est stétiu contau fatuvatu po médiu de unu "Blog" dedicau a su progetu: https://lanostrabibliotecablog.wordpress.com/
Programma
Cenàbara 12 de Abrili - Pauli Gerrei in su Tzentru de Agrgatzioni Sotziali in bia Pertini
14.30 (duas e mesu), Sterrida de is Síndigus de Ballau, Severino Cadeddu, e de Pauli Gerrei, Stefano Soro.
Presentada de is arresurtaus de su progetu "Sa Biblioteca de s'Identidadi". Presentis is insenniantis, is operadoris didàticus, is babbus e is mammas e is studiantis.
14.45 (tres mancu cuartu), "Sa Biblioteca de s'Identidadi", intervenint Claudia Paba, referenti scolàstica de su progetu, e Valeria Sanna de s' assótziu culturali "Malik" - Arresurtaus sodigaus, metodologia e pianus de interventu in unu progetu chi at tentu sa tarea de ammanniai s'oferta formativa in sa scola elementari "Edmondo de Magistris".
15.00 (tres de a merí), Labboratóriu de circa - Is arreíxinis de sa memória: sa stória cosa nosta in unu líbburu". Intervenint Alessandra Caddeu e Lorenzo Ghiani. Is atividadis de circa ant permítiu a is studiantis de creai is cuntenutus de is scritus, partendi de is materialis donaus de s'Assótziu Paulesu - Tzírculu Culturali Antzianus, de is scritus pubricaus e po médiu de contus e immaginis de is caraterísticas su territóriu. S'interessamentu s'est cuntzentrau pruschetotu asuba de dexi argumentus, de sa cosa de papai, a sa stória de su Gerrei a is crésias.
Po dónnia argumentu is circadoris ant apariciau didàscalias e immàginis, amparendi sa memória de totus in manera creativa e imparendi notzionis de basi chi pertocant s'italianu, sa stória, sa giografia e arti e immàgini.
15.15 (tres e cuartu), Labboratóriu artísticu: "Sa mata de s'Identidadi: su líbburu de lana". Intervenint Claudia Gagliardi e Rosangela Sedda.
Su labboratóriu at trasmítiu a is piciocheddus is cuntenutus chi pertocant sa filera de sa lana de brebei sarda, sa stória e s'umperu cosa sua. In sa parti creativa de su labboratóriu, is studiantis ant tentu sa possibbilidadi de fai sa libreria cosa insoru cun sa ténnica de sa cartapesta, de cosiri, de acapiai a pari cun sa lana is scritus cosa insoru e de arrecamai is cobertinas pretziosas, afortiendi sa creatividadi e s'abbilidadi de is manus.
15.30 (tres e mesu de a merí), Su "blog" Sa Biblioteca de s'Identidadi. Intervenit Claudia Sedda.
Is atividadis artísticas e de circa funt stétias contadas e spartzinadas po médiu de unu "blog" dedicau a su progetu: www.lanostrabibliotecablog.wordpress.com