SARDU
Comunu de Teulada: Mércuris 5 de Austu 2020, in sa Domu baronali, de is ses fintzas a is otu e mesu de a merí (18.00 – 20.30) nc'est sa presentada de su líbburu "Carlo Felice e i tiranni sabaudi" de Francesco Casula.
Respetendi is normas de preventzioni contras a su Covid-19 s’intrada est cuntrollada e duncas po non fai ammuntonamentus, tocat a si prenotai mandendi una e-mail a: cultura.sarda2020@gmail o telefonendi a su númunu: 3890191709. Sa presentada dda organizat s'Ufítziu de Língua Sarda de su Comunu de Teulada, finantziau cun su dinai de sa Regioni Autònoma de Sardigna cunformas a sa L. 482/99 “Normas in matéria de amparu de is minorias linguísticas stóricas.
Su líbburu
Su líbburu dd'at imprentau "Edizioni Grafica del Parteolla" in su 2018 e tenit sa tarea de contai s'ategiamentu de is Savoja faci a sa Sardigna in s'interis de su domíniu cosa insoru asuba de su Rénniu de Sardigna e de s'Ísula apustis chi est birintada a fai parti de su Rénniu de Itàlia. Segundu su parri de s'autori a is sardus ddus ant trataus cumenti a unu pópulu inferiori rispetu a su piemontesu. Meda sa bibliografia arremonada e is fatus esaminaus. Carlo Felice, allomingiau "Carlo il Feroce" po Casula est stétiu unu de is visurreis de su Rènniu de Sardigna prus sanguinàriu.
S'autori
Francesco Casula, nascit in Ollolai e fait su litzeu anche is Gesuitas in Torino, si làureat in Stória e Filosofia in s'Universidadi de Roma. Po unus coranta annus ai insénniau in is Litzeus e in is Istitutus superioris. Impinniau in política, est stétiu segretàriu generali de sa Cunfederatzioni Sindacali Sarda (CSS); giornalista pubritzista, est stétiu diretori responsàbbili de "Il Solco", su giornali de su PSD'Az, de "Tempus de Sardìnnia, su mensili bilíngui de sa CSS e de medas àteras rivistas.
Studiosu de stória, língua e cultura sarda, asuba de custus argumentus fait cunferéntzias e cursus de formatzioni e de agiornamentu in is scolas po studiantis e insenniantis, e in is Universidadis de sa Tertza Edadi. At fatu parti 5 annus des' Osservatóriu Regionali de sa Língua e de sa Cultura Sarda.
Fait parti de medas giurias de Prémius Literàrius de poesia sarda, intra de custus su "Premio Ozieri" su prus antigus e prestigiosu.
Intra de is pubricatzioni cosa sua:
"Letteratura e Civiltà della Sardegna", ed. "Edizioni Grafica del Parteolla", 2013.
"Statuto sardo e dintorni", ed. Artigianarte, Cagliari 2001;
"Storia dell'Autonomia in Sardegna" (imparis a Gianfranco Contu), ed. Grafica del Parteolla, Dolianova 2009;
"La poesia satirica in Sardegna" . ed. Della Torre, Cagliari 2010;
Po sa Domu de Imprenta Alfa Editrice at pubricau 11 monografias:
"Grazia Deledda", 2006;
"Leonora d'Arborea", 2006;
"Antoni Gramsci" ( imparis cun Matteo Porru), 2006;
"Antoni Simon Mossa", 2006;
"Amsicora" (cun Amos Cardia), 2007;
"Zuanne Maria Angioy" /imparis cun Zuanne Cottu), 2007;
"Marianna Bussalai" (imparis cun Zuanna Cottu), 2007;
"Sigismondo Arquer" ( imparis cun Marco Sitzia), 2008;
"Giuseppe Dessì" (imparis cun Veronica Atzei), 2008;
"Montanaru" ( imparis cun (Joyce Mattu), 2008;
"Gratzia Dore", 2008;
"La Lingua Sarda e l'insegnamento", 2010;
"Uomini e donne di Sardegna", 2010.