SARDU
Comunu de Gùspini: Est inghitzada sa “Cassa a is allenus” in is scolas guspinesas. Cassa a is allenus difatis est su nómini de su progetu de educatzioni ambientali asuba de is arratzas de matas e de animalis invasivas (chi ndi prenint totu) allenas (originàrias de àterus logus), prumóviu de s’Amministratzioni Comunali de Gùspini po s’annu scolàsticu 2018/2019, gràtzias a s’agiudu de s’Universidadi de Casteddu, in su spetzíficu de su Dipartimentu de Sciéntzias de sa Vida e de s’Ambienti – Setzioni Botànica. Su de is arratzas invasivas allenas est de unus cantu annus un’argumentu de grandu atualidadi.
Est unu progetu de comunicatzioni chi nascit pighendi a modellu unu progetu europeu: “ Life Asap”, alleada est s’Universidadi de Casteddu. In calidadi de ambasciadori de progetu, su Comunu de Gùspini si fait portadori de su messàgiu chi: "Donniunu de nosu, mancai cun gestus piticus, podit agiudai a smenguai s'intrada de is arratzas allenas invasivas e ndi mitigai is dannus". Ddu fait pruscatotu fichendi in su camminu sa scola primària cun sa cunvintzioni chi su trabballu fatu imparis intra de is amministratzionis púbricas e is scolas siat de importu po aumentai sa cusciéntzia asuba de su dannu chi custas arratzas podint fai.
Su progetu previdit non scéti unu camminu didàticu in àula, acapiau a sa connoscéntzia de is arratzas allenas chi nci funt in Sardigna, ma puru sa bisíta ghiada a s'Ortu Botànicu de Casteddu a sa scoberta de su "Camminu Flora invasiva", inaugurau de pagu.
Sa tarea finali est sa de spartzinai sa connoscéntzia de is cumportamentus giustus de ponni in pràtiga po limitai su probrema e pruschetotu fuiri sa pérdita de sa biodiversidadi. In su spetzíficu funt previdius 3 labboratórius:
- Amparaus sa biodiversidadi;
- Salvaus su praneta terra;
- Connosceus is arratzas allenas.
Ant acunsentiu a su progetu medas classis de is scolas guspinesas:
"Satta" TP: 3^A, 4A^, 5^A;
"Is Boinàrgius": 3^A, 5^A
"Dessí": 2^A, 3^A, 4^A, 4^B, 5^B.