SARDU
Comunu de Casteddu: “Benei a teatru, ca est unu logu siguru”. Est custa sa seguresa de su Síndigu de Casteddu, Paolo Truzzu chi, chistionendi in sa cunferèntzia stampa de presentatzioni, oi, gióbia 13 de Gennàrgiu 2022, de is atividadis in programma in su 2022 cuncordadas de CeDAC – Centru Diffusione Attività Culturali e de Jazz in Sardigna, in su Teatru Màssimo at bófiu torrai a oberri a manera ideali is gennas de bia De Magistris.
“Unu logu che a custu, biu su chi est acontéssiu in cuscus duus annus, benit a èssiri unu logu de vida chi s’agiudat a barigai su momentu de dificultadi manna, sotziali e económica, chi eus bíviu. Unu logu de produsidura po sa menti, unu pagu scaréscia in cuscus tempus, ma indispensàbbili poita ca is logus de arrexonu agiudant puru a fai cresci su tèssiu sotziali e serbint a is comunidadis po s’ammellorai e serbint a sa política puru po arrexonai apitzus de is scioberus chi fait.
E sa programmatzioni est de importu mannu poita ca impressa medas disciplinas, cun spetàculus chi arrennescint a acostiai su connotu cun sa stória e cun s’annoamentu puru. Custu est unu tempus chi si tocat a èssiri atrivius, poita ca depeus bivi impari cun su virus e is arriscus funt pagu pagu prus lébius. Nci bolit atriviment po bessiri de domu, abbitai is logus e fai sa vida chi faestus innantis, ca desinuncas arriscaus de torrai a serrai totu”.
Teatru cumenti logu po insutzuligai sa conca, bonu po fai arrexonai e po apariciai cussas ocasionis de socializatzioni chi funt stétias strobbadas meda in cuscus duus annus passaus. Imoi sa situatzioni, mancai chi su Covid siat torrau, parit donai calincunu tretu de positividadi e in custu sítiu sa gestioni noa de su Teatru Màssimu donada a CeDAC e Jazz in Sardegna, at a podi fai sa parti cosa sua.
Prenu su cartelloni de is atóbius chi, cumintzaus su 4 de Gennàrgiu ant a sighiri fintzas a su 28 de Maju cun sa tarea decrarada de ponni a dispositzioni su teatru po trexentus diis a s’annu.
“Custa – at nau s’Assessora a sa Cultura de su Comunu de Casteddu Maria Dolores Picciau – est una dii stórica. S’acórdiu intra CeDAC e Jazz in Sardegna, duus pilastrus mannus de su spetàculu e de s’organizatzioni a livellus mannus meda, torrat a portai Casteddu a cussu chi fiat unus dex’annus fait, candu fiat su centru de sa cultura natzionali e internazionali gràtzias a is palinsestus stravanaus. E cussu tempus parit chi est torrendi immoi. Prosa, dantza, circu, música jazz cun nomini nodius, ma bollu acrarai puru chi s’est donendi logu meda puru a is gióvunus. Su Teatru Màssimo s’ammostat cumenti a unu logu innui no nc’ant a èssiri spetàculus sceti, ma at a èssiri un’ammosta de sa tzitadi e puru unu logu po fai arretza cun is atividadis produtivas e cummercialis de Casteddu”.
A s’atóbiu cun sa stampa, in prus de su primu tzitadinu casteddaju e de s’Assessora Picciau, ant pigau parti puru su presidenti e sa diretora artística de su CeDAC, Antonio Cabiddu e Valeria Ciabattoni, su diretori artísticu de Jazz in Sardigna, Massimo Palmas e Mauro Contini in rapresentàntzia de s’Assessorau de s’Istrutzioni Púbblica, Benis Culturalis, Informatzioni, Spetàculu e Sport de sa Regioni Sardigna.