SARDU

Províntzia de su Sud Sardigna: Sa Províntzia de su Sud Sardigna in esecutzioni de sa determinatzioni n.17 de su 24 de Friaxu 2020, cumbidat totus is assótzius interessaus a presentai sa manifestatzioni de interessamentu cosa insoru po pregontai s’inserta in su programma de prumotzioni visíbbili de sa língua sarda chi previdit sa cumpridura in sardu o sardu – italianu de “depliant”, locandinas, opúsculu, striscionis, o àteru, chi pubritzizInt acontéssius culturalis, de spetàculu e isportivus de fai in su territóriu provintziali.

Sa tarea de su progetu est sa de prumovi su bilinguismu sardu – italianu e s’umperu de su sardu cun sa matessi dinnidadi de s’italianu po sa prumotzioni de is atividadis de recreu, culturalis e lúdicas – isportivas.

A CHI EST INDIRITZAU?

Is sugetus interessaus funt: Assótzius culturalis chentza guadàngiu, assótzius isportivus non professionísticus e àterus sugetus costituidus “ad hoc”  o po sa cumpridura de acontéssius determinaus de fai in su territóriu de sa Províntzia de su Sud Sardigna.

Totus is acontéssius de fai depint portai su lògu de sa Províntzia e is riferimentus a is lei chi pertocant s’amparu de sa minoria linguística de innui ndi benit su cuntribbutu.

APRETZIAMENTU DE IS ISTÀNTZIAS

Is istàntzias lómpias ddas apretziant is ufítzius de sa Províntzia in basi a sa coeréntzia cun su chi previdit sa L. 482/99, sa L.R. 3 de Argiolas 2018, n. 22 e sa L.R. 6/2012 art. 2 comma 13, e cun su progetu finantziau de sa Regioni po s’annualidadi 2018.

Si tenit contu de s’órdini de arribbu a su protocollu po s’apretziamentu e s’ammissioni de is istàntzias, chi  funt satisfadas fintzas a s’acabbu de su dinai.

Si donat prioridadi a is istàntzias chi pertocant is initziativas de fai in is comunus alleaus in su 2018 de su progetu de sa Províntzia: Carbònia, Scalepranu, Stersili, Giauni, Gèsturi, Gùspini, Goni, Igrèsias, Ísili, Pabillonis, Seddori, Serrenti, Teulada, Turri, Ussaramanna, Biddacidru, Mara Arbarei e Biddanoa de Forru.

TÉRMINIS E MANERAS PO SA PRESENTADA DE IS ISTÀNTZIAS

Is istàntzias, in paperi simpli cunformas a su modellu acapiau, tocat a ddas presentai aintru de su 16 de Martzu 2020 a sa Províntzia de su Sud Sardigna – Àrea Cultura – Ufítziu de Língua Sarda – Dot.ra Alessia Etzi 0709356356- 3385340472- protocollo@provincia.sudsardegna.gov.it.

  DINAI

Su dinai po sa cumpridura de s’interventu fait parti de su finantziamentu regionali de su progetu “Sighidura de sa sperimentazioni linguística de sa Províntzia de su Sud Sardigna”,  de sa L.R.  6/2012, art. 2, comma 13 – Fundus integrativus regionalis L. 482/99 artt. 9 e 15 de “Amparu de is Minorias linguísticas stóricas” annualidadi 2018.