SARDU

Comunu de Santu’ Èngiu: Fonti: "La gazzetta del Medio Campidano": Su 2 de argiolas 2022 at a essi una dì stòrica po Santu Èngiu: at a essi incingiau s’anfiteatru comunali. Milla e otanta postus: sa strutura noa s’agatat agoa de su Teatru Comunali in bia Dante, puntu de importu mannu po totu sa zona de su 1994, candu Paola Borboni dd’at inaugurau. Fiat unu spetàculu de su Cedac e puru custa borta at a tocai a su Cedac. In scena sàbudu 2 de argiolas, ddoi at a essi Tullio Solenghi chi at a ligi, a manera sua, “L’ Orlando furioso” de Ludovico Ariosto. Solenghi est stimau meda de totus. At a essi sa primu de cincu datas de sa rassinna de s’istadi “Teatro & prosa”, realizada de s’amministratzioni comunali in collaboratzioni cun sa Cedac. Su noi de argiolas, sempri de sàbudu, e sempri a is noi oras, Federico Buffa, at a contai sa sua “Italia mundial”. Corant’annus a pustis de Italia- Germania 3-1 (11 de argiolas de su 1982), su giornalista e scritori s’at a fai sudai e imbriagai cumenti a cussa giorronada de bòcia e birra. Su 16 de argiolas a is noi oras de noti, in “ApPunti G”: Lucia Vasini, Rita Pelusio, Alessandra Faiella, ant a chistionai cun sa giornalista. Chistionendi puru e pruschetotu de “G”, ca fisica a parti, no pertocat sa gravidadi de Isaac Newton.

Su 30 de argiolas tocat a Enzo Iacchetti cun “Intervista confidenziale”, preguntat a issu e totu de chistionai de su passau cosa sua. Una carriera inghitzada in su palcu de su“Maurizio Costanzo Show”. Si serrat su 10 de austu, dì de Santu Larentu, stellas po totus, striscias po nisciunus, cun “Scomode verità e 3 storie vere” de e cun Giampaolo Morelli, est a nai s’ispetori Coliandro televisivu. In scena cun issu Gianluca Ansanelli. Pièce spassiosa e frisca po cumbati sa basca e su buddidori.