SARDU
Comunu de Carbònia: Cenàbara 5 de Abrili, a is cincu de a merí (17,00), in is aposentus de sa Sotziedadi Umantitària - Fàbrica de su Tzinema bécia, ddoi at un'atóbiu nou cun sa rassínnia "Carbonia Scrive", sa proposta de prumotzioni de sa scritura e de sa letura organizada de su Comunu de Carbònia imparis cun su Sbis (Sistema Bibliotecàriu Interurbanu de sa Maurreddia ). Nc'est sa presentada de su líbburu intitulau "Dall'Enel alla Carbosulcis" de Carlo Panio, scritori de Carbònia, e pubricau de Carlo Delfino. Su líbburu torrat a arremonai sa stória de s'època minerària, caraterizada de 50 annus de lotas operajas, sindacalis e políticas, umperendi pruschetotu una fonti de grandu valori cumenti a is artículus de giornali.
Su líbburu ponit in luxi cun arrichesa de particularis is probremas chi ant caraterizau unu setori, cussu mineràriu, innui asuba, tempus meda, ant postu is abetus de trabballu unas centu famíllias de su territóriu cosa nosta.
In particulari, s'autori, at postu s'atentu cosa sua asuba de is acontéssius de sa Carbosulcis, costituida po torrai a donai importu a su carboni po sa produtzioni de energia elétrica. Carlo Panio non at stentau a ponni in luxi is mancàntzias, is probremas e is erroris de pianificatzioni fatus a livellus diferentis, de su "managment" de s'azienda a is istitutzionis políticas.
A sa presentada de su líbburu intervenint, in rapresentàntzia de s'Amministratzioni Comunali, sa Sindaghissa Paola Massidda e s'Assessora a sa Cultura, Sabrina Sabiu.