SARDU
Comunu de Ollasta: Fonti: "La Gazzatta del Medio Campidano": Sàbudu su 18 de martzu in sa domu museu, sa presentada de su libru de Stefano Floris.
Poita in sa vida si podit arrui. Ma agatai puru sa fortza de si ndi torrai a pesai e torrai a nasci.
Una stòria bella ca est fadendi su giru de sa Sardigna e immoi arribat puru in su tzentru de sa Marmidda Arta. Sàbudu su 18 de martzu a is ses de a merì in sa domu museu de Ollasta, Stefano Floris de Furtei at a presentai su libru suu “Danzando sotto la pioggia” in d-unu atòbiu culturali pensau po totus is biddajus de su territòriu, organizau de sa Pro loco e de s’amministratzioni comunali. “Seus cuntentus meda de ospitai a Stefano Floris, su libru suu e sa stòria sua”, ant nau su sìndigu Marcello Pilloni e sa presidenti de s’assòtziu turìsticu Fatima Malloci, “seus sigurus ca at a essi unu merì arricu de emotzionis po sa comunidadi nosta”. Su presidenti de su Cunsòrtziu Due Giare Lino Zedda at aciuntu: “Dònnia esperièntzia de vida arricat is personas chi dd’ascurtant. Torraus gràtzias a sa Pro loco e a su Comunu de Ollasta po custa initziativa bella”.
SU LIBRU. Su libru “Danzando sotto la pioggia”, imprentau de Santelli, 434 pàginas, bessiu calincuna cida passada, contat, sa stòria de una arruidura e de una renàscida. De unu riscatu, de amori, de morti e pruschetotu de sa fortza de su biaxi chi totu sanat. Totu inghitzat s’8 de gennàrgiu 2010. Sa savana e unu viàgiu in trenu longu meda, a pustis su protagonista e una fèmina cun is pilus nieddus e mòvius – chi a bellu a bellu inghitzat a fai parti de sa vida sua – e ddoi at a abarrai po sempri. Issus funt Stefano Floris e Tiziana Nuvoli, connotus de sa genti po mesu de Videolina, po is programmas chi ant fatu impari e chi funt praxus meda, viàgius po circai sardus in totu su mundu. Po is chi bolint scoberri custa stòria s’apuntamentu est po sàbudu su 18 de martzu a is ses de merì in Ollasta.