SARDU
Comunu de Seddori: Inghitzat su de 2 acabbus de cida de “Sanluri Legge”. Càmbiat su logu ma est eciseri aici etotu. De gióbia a domínigu “Sanluri Legge” est po sa primu borta in su tzentru stóricu, in su pratzali de sa Crésia de Santu Larentzu.
Su 22 de Làmparas 2023 a h. 19: 00 (seti de a merí) lompit Marcello Atzeni cun “Donne che pensano con gli occhi”. Atzeni est de domu, su giornalista e scritori seddoresu ndi fueddat cun Alessandra Ghiani e contat s'universu femmininu.
Infatu h. 20:30 ( otu e mesu de a merí) si fueddat de sport cun "Mio Papà, il padre dello scudetto": Stefano Arrica, Sergio Cadeddu e Gianluca Zuddas ndi arrexonant cun Francesca Figus. "Amarcord" asuba de s'annu de oru de su Casteddu e sa vitória de su campionau de fúbbalu de Série A.
Su 23 de Làmparas apuntamentu únicu cun Stefano Floris cun su "recital" : Danzando sotto la pioggia", diàriu de sa vida sua peri is esperiéntzias chi dd'ant sinnau de prus.
Sàbudu 24 de Làmparas torra apuntamentu dópiu, ambaduus is autoris fueddant cun Andrea Fulgheri. Inghitzat Igor Melis a is seti de a merí (h. 19:00) chi contat sa primu prova literària cosa sua "Sa Crai" chi punnat a amparai sa Sardigna prus auténtica e is risorsas ambientalis stravanadas cosa sua.
Sighit a is otu e mesu de a merí (h. 20:30) Jean Claudio Vinci, partiu de Seddori a sa conchista de is Stadus Unius e immui fumetista de sa Disney. Portat a s'atentzioni de su púbblicu "Fumetti e non solo".
S'úrtimu apuntamentu de "Sanluri Legge 2023" bit sa preséntzia in su palcu de Flavio Soriga po totu sa serada. Su scritori campidanesu innantis fueddat cun Luciano Marroccu , stóricu apretziau e ideadori imparis a àterus nóminis nodius de sa literadura sarda de su "Festival de Gavoi" e autori intra de is àteras òperas de "Storia popolare dei Sardi e della Sardegna".
Apustis, imparis a Renzo Cugis, Soriga est protagonista de "Sardi della pianura" unu spetàculu chi issus etotu ant scritu, lígiu, retzitau, sonau e cantau, innui ponint in craru cumenti su pranu de su Campidanu no est scéti una regioni de s' Ísula ma unu stadu mentali puru, una pàtria culturali, unu logu míticu e reali in su matessi momentu.
Intra de un'autori e s'àteru ddoi at un' intramesu cun tastaduras e is càlicis de is cantinas "Su Entu".