SARDU

Comunu de Santu Antiogu: "Bonifiche: pianificare e progettare per il riutilizzo del territorio: il caso Seamag Sant'Antioco". Custu s'argumentu de su cunvénniu chi si fait lunis 25 de Donniasantu, a is cuatru e mesu (16.30), in s'Àula de su Consillu de su Comunu de Santu Antiogu, Pratzita Italo Diana n. 1. Organizau de sa Cgil e de sa Filctem Cgil cun s'agiudu de su Comunu de Santu Antiogu, proponit unu "focus" asuba de is boníficas e, pruschetotu, asuba de su casu de sa Seamag de Santu Antiogu, difatis  is operatzionis de sanamentu non funt ancoras acabbadas, mancai siant passaus annus meda de candu at serrau sa fàbrica acanta de su tzentru abbitau.

Su programma previdit sa relata de sterrida de Emanuele Madeddu, segretàriu Filctem SSO, is saludus de su Síndigu de Santu Antiogu Ignazio Locci e de su segretàriu de sa Càmera de Trabballu SSO Antonello Congiu. Sighint sa relata  ténnica de Mario Cabriolu ("Bonifica e progettazione area Seamag") e is interventus de is assessoris regionalis: de s'Assessora  a s'Indústria, Anita Pili; de s'Assessori a is Trabballus Púbricus, Roberto Frongia; e de s'Assessori a s'Ambienti, Gianni Lampis; e sighit puru  s'interventu de s'Amministradori Únicu de Igea, Michele Caria. Acabbat su Segretàriu Generali de sa Cgil sarda Michele Carrus.

Cordinat is trabballus Francesco Garau, Segretàriu Regionali Filctem.