SARDU
Comunu de Santu Antiogu: De sàbudu 7 de Meseidas 2019, a is cincu e mesu de a merí ( 17.30) a lunis 6 de Gennaxu 2020, mesunoti (00.00)
Innui: Comunu de Santu Antiogu (SU)
Descritzioni: In su coru de su tzentru tzitadi, a sa scoberta de is segretus de su "Giardino Fatato". Faci a sa domu-igloo de Babbu Natali, fintzas a sa maja de su grandu Steddu de Pratza Umberto. In Santu Antiogu est oramai giai totu prontu po s'inauguratzioni de su "Villaggio di Natale", in programma sàbudu 7 de Meseidas, cun una parada manna chi contat prus de 120 cumponentis, intra de sbandieradoris, "mascotte" de sa Disney, sa banda musicali, sa slita de Babbu Natali longa tres metrus, su carrotzinu de "Cenerentola" e de su printzipi cosa sua. Sa sfilada inghitzat a is cincu de a merí (17.00) de sa Crésia de Nosta Senniora de Bonària e acabbat in Pratza Umberto, innui nc'est sa "Casa dei Giochi" po is pipius e sa "Fiera Mercau", innui dominat unu steddu mannu luxenti. Sa dí sighit cun s'abertura de sa Fiera Mercau e s'alluidura de is luxis, intamis Pratza Itàlia est dedicada de unu totu a is pipius, cun sa segada de sa feta de s'igloo de Babbu Natali e de su "Giardino delle Fiabe", acumpangiau de medas spantus: tzúcuru filau, "pop corn", animatzioni, fotografias, luxis e música.
"Ocannu eus fatu unu furriadroxu chi imprassat totu su tzentru tzitadinu ingiriau de luminàrias únicas - narat s'Assessora a su Turismu, Roberta Serrenti - capassas de creai un'atmosfera ecisera: de is alaxus in sa Crésia de Bonària, fintzas a su "Giardino delle Fiabe" de Pratza Itàlia, sa mata a s'intrada de sa bidda, is luminàrias chi nci funt in is bias printzipalis de su tzentru e su petzu forti cosa nosta: su Steddu Luxenti de Pratza Umberto, únicu in Sardigna e artu seti metrus. Chentza scaresci su Cursu Vittorio Emanuele, chi est arricau de unu cordoni luxenti chi eus torrau a batiai "Cielo Stellato". Non mancat s'animatzioni, pruschetotu in is acabbus de cida e in dís a cuaddu de Paschixedda: contus, labboratórius, giogus e spetàculus de maja. Ocannu torrat puru su cuncursu "Vetrina di Natale" asuba de is contus Disney, cun is butegas de su tzentru cuncodradas a festa. Bollu torrai gràtzias ancoras una borta s'arretza manna de cummertziantis de Santu Antiogu chi in dónnia ocasioni si arramangant is mànigas po animai sa tzitadi cosa nosta, garantendi ocasionis nobas de svilupu e créscida, asuta de su sinnu de sa cumpartzidura e de s'unidadi".
Su programma previdit 16 dís de animatzioni, cun acontéssius dedicaus a totus e cun un'atentzioni particulari a is famíllias e a is prus piticus. Cunfirmau, ocannu puru, su grandu Presépiu biventi (Su nascimentu in gruta, peri is bias de Betlemme) chi cumenti costumat si fait domínigu 8 de Meseidas in su tzentru stóricu (bia Necropoli - Furriadroxu Ipogeo) cun unus centu figurantis. E ancoras, àterus atóbius de non perdi: s'inauguratzioni de s'ammusta "I Presepi nell'Isola" e de su Presépiu artísticu de Gianni Salidu, in su Cursu Vittorio Emanuele. A s'acabbu, domínigu 5 de Gennaxu 2020 "Aspettando la Befana", cun su cuncursu de sa Befana prus Bella chi acabbat cun sa sfilada e sa calada de sa Befana de su celu.