SARDU

Comunu de Santu Antiogu: Cenàbara 20 de Meseidas, a is cuatru de a merí (16.00), in su MAB, Museu Archeológicu Ferruccio Barreca de Santu Antiogu, nc'est sa presentada de su líbburu "Il Paese dei Cuori" a sa preséntzia de is autoris, Dot. Roberto Tumbarello e sa Dot.ra Sabrina Montis. S'Archeologia e sa stória de Sardigna atóbiant sa cardiologia e is professionistas cosa sua. Non est fàtzili spricai a is pipius is cardiopatias cungénitas (difetus averiguaus fatuvatu in su períodu innantis de sa nàscida) , ma su diretori de su repartu de Cardiologia Pediatrica de s'Azienda Spidaliera G. Brotzu de Casteddu, Dot. Tumbarello e is chi trabballant cun issu nci funt arrannéscius, umperendi cumenti a podda sa stória antiga de Sardigna, de is abbitantis cosa sua e de nuraxis. Ligendi custu bellu líbburu, is pipius e non scéti scoberrint cosas de importu asuba de s'órganu vitali de su corpus, su coru, e ddu faint gioghendi e spiassiendusí.

Su líbburu non tenit unu prétziu de béndita: si podit donai un'oferta chi andat a agiudai su repartu de cardiologia pediatrica de sa Azienda Spidaliera G. Brotzu de Casteddu, tzentru de arrelatu in Sardigna po sa diagnosi e sa cura de is cardiopatias cungenitas. Custu repartu de su Brotzu rapresentat unu modellu de "Spidali - non Spidali" innui ainas tennológicas  avantzadas funt mascaradas in unu logu praxili e funt integradas in manera perfeta cun tennologias psicológicas (che s'ipnosi e sa "Pet Therapy") chi agiudant a bivi sa cardiopatia in manera prus pagu tosta.