SARDU

Comunu de Santu Antiogu: Fonti: "L'Unione Sarda": In Santu Antiogu sa coxina atóbiat sa scientzia. Acontessit in s’Istitutu Ipia “Loi” de s’indiritzu enogastronómicu, innui unus trinta studiantis funt impignaus in su progetu multidisciplinari: “Ollestincu”, s’ollu de is póburus e àterus alimentus funtzionalis de sa costumàntzia sarda”

Organizau de sa scola cun s’agiudu de s’Universidadi de Casteddu, de su Cnr-Ispa de Tàtari e de unas cantu circadoras, su progetu proponit unu camminu formativu chi punnat a fai a connosci a is studiantis is propiedadis de s’ollestincu e de àterus alimentus de sa costumàntzia sarda, cun sa tarea de fai pigai cusciéntzia a is generatzionis nobas de s’arrichesa de su territóriu innui bivint po s’avaloramentu de is spetzifitzidadis de su logu de apartenéntzia.

“Po médiu de su trabballu fatu imparis de sa scola, de s’Universidadi e de is realidadis produtivas de su territóriu – spricat sa dirigenti Giorgia Floris – s’Istitutu cosa nosta bolit donai a is studiantis un’oportunidadi de créscita culturali e ddis donai strumbulus po pentzai unu progetu de vida personali”.

Is studiantis diaici ant connotu is propiedadis terapéuticas de s’ollestincu. Difatis giai si scit cumenti sa modditzi at acumpangiau sa vida de is sardus de mill’annus: non scéti un’alimentu, impreau in is períodus de carestia in logu de s’ollu de olia, ma una mexina naturali potenti. “ Donai a is studiantis is connoscéntzias e is cumpeténtzias po avalorai is spetzifitzidadis localis est su primu passu po prumovi unu turismu enogastronómicu de calidadi – narat sa Prof.ra Alessandra Zara, referenti de su progetu – donendi unu cuntribbutu piticu ma de importu a su svilupu de s’economia de su territóriu.