SARDU
Comunu de Santu 'Èngiu: Fonti: Sangavinomonreale.net - Su 24 de Donniasantu in Santu 'Èngiu nc'est su de tres atóbius de su tziclu "Mulieres - Grazia e Coraggio": is percursus de "Mulieres" intra de is murales. S'Assessorau a sa Cultura e a is Paris oportunidadis de su Comunu de Santu 'Èngiu organizat una pedalada de "Mulieres tra i Murales" dedicaus a is fémminas, unu filu cundusidori po ammirai caras de fémminas mantzebas, líbberas e atrividas, rapresentadas de medas artistas chi si dedicant a sa "Street Art".
In programma unu giru in bicicreta peri is bias de sa bidda sighendi su filu cundusidori de is murales femmininus cun s'agiudu pretziosu de s'assótziu "Monreale Bike" e de s'assótziu "Skizzo". Si nci podit iscriri anca su Tzilleri Congia cun unu cuntribbutu de 3€ ( esclúdius is pipius fintzas a is 10 annus): donant una sciarpa arrúbia cun su símbulu de Mulieres de ponni in s'interis de su percursu.
S'atóbiu est fissau a is noioras e mesu de a mengianu (09.30) a faci de su murales in bia Pascoli, prontus a sa parténtzia. A s'acabbu de su giru ddoi at un'intramesu musicali: ancoras un'ocasioni po arrexonai e arregordai, a incuru de Anna Paola Corsi.
Su percursu de sa pedalada:
- bia Pascoli (Kipi Skipi - Non siamo principesse, siamo eroine di noi stesse)
- parchégiu de su Spidali (Emma Rubens e Valeria Navarrete)
- bia Roma (Kore – Giorgio Casu) > Giardinetti (Andrea Meli – I giardini)
- bia Roma (Bastardilla – Stimi stami)
- bia Roma (Pina Monne – Tradizioni Sangavinesi)
- bia Roma (La Fille Bertha – Carnival Princess
- Statzioni bécia (Eleonora – Giorgio Casu)
- bia Tiziano (Gabriel Moreno – Eva)
- bia Dante (Leticia Mandragora Grazia Deledda)
- bia Eleonora (Sergio Putzu)
- bia Trento (Daniela Frongia – TraMandare)
- bia Trento (Mamblo – Pratza de sa Música)
- bia Zara (Claudia Filigheddu – Téssere)
- Pratza Resistenza
Su 25 de Donniasantu, Giornada internatzionali po sa sperdidura de sa Violéntzia contras a is Fémminas, si proponit unu "flash mob", interessendi totu sa comunidadi: totus podint esponni in manera simbbolica unu pannu arrúbiu in dónnia domu che sinnu de partitzipatzioni e bixinàntzia a is vítimas de violéntzia e femminitzídiu.