SARDU
Is monumentus archeològicus e is paisàgius de sa Sardìnnia ant a essi su tzentru de s'atòbiu de sàbudu 24 de su mesi de ladàmini, a is 10:30 de a mangianu, in su Tzineteatru comunali de Sàrdara, in bia Casteddu 7. S'ocasioni est sa primu presentada de “Perda Mama. Archeologia e paisàgius de sa Sardìnnia antiga”, su lìbburu fotogràficu de Alessandra Cossu e Fabrizio Bibi Pinna, pubblicau dae Imago Editzionis.
S'atòbiu est organizau de su Tzentru Stùdios Àcuas sacras de Sardìnnia e de su Tzìrculu ARCI 1° de Maju de Sàrdara, cun su patrotzìniu de su Comunu de Sàrdara. S'intrada est lìbera e abertu a totus.
Su volùmini proponit unu contu fotogràficu de 160 pàginas dedicau a sa matèria e a is formas de is monumentus archeològicos, a s’arrelata insoru cun su paisàgiu e a is arrastus de sa stòria antiga de s'Ìsula. In su mangianu s’ant a fai biri unas cantu imàginis de su lìbburu, po acostai su pùbblicu a custu patrimòniu cun d-unu unu linguàgiu visivu de oindii. Ant a partetzipai fintzas unas cantu classis de sa scola segundària de primu gradu.
Ant a interbenni Giuseppe Garau, moderadori de su Tzentru Stùdios Àcuas sacras de Sardìnnia, e is duus autoris, Alessandra Cossu e Fabrizio Bibi Pinna. A presentai s'atòbiu at a essi Susanna Lavazza, giornalista e ghia ambientali escursionistica.
Nàsciu s’annu passau aìnturu de su tzìrculu ARCI de Sàrdara, su Tzentru Stùdios Àcuas sacras de Sardìnnia promovit su connoscimentu de is fontis sacras, de is tèmpius a funtana e de is funtanas sacras sardas. Intre is punnas suas ddoi funt fintzas sa spainadura de sa cultura de is àcuas coment’e mitzas de benistai e s'aprofundimentu de is liòngius intre is tziviltadis antigas.