SARDU
Marmillibri, sabato 31 ottobre Tiziana Ferrario a Siddi con “La voglia di andarsene”
A is 18, in s'Àula consiliari de su spidali bèciu Managu, sa giorronalista e scritora presentat su lìbbubru suu in contu is giòvunus chi lassant s'Itàlia e in contu de is famìlias chi abarrant. In programa fintzas una letura de “Su movimentu elementari” de Fabiano Alborghetti.
Poita giòvunos meda sceberant de fraigai su benidori insoru atesu de s'Itàlia? Ita signìficat, po is famìlias e po is comunidadis, a ddus biri partendi? Funt is pregontas a su tzentru de s’atòbiu imbenienti de Marmillibri 2026, chi sàbudu 31 de ladàmini, is ses de merì, at a portai in Siddi Tiziana Ferrario. In s'Àula consiliari de de su spidali bèciu Managu, in pratza Leonardo da Vinci, sa giorronalista e scritora at a presentai “Sa gana de si nd'andai. Sos fìgios a s'èsteru, su mali mannu de s'Itàlia”, pubblicau de Fuoriscena.
S'atòbiu at a donai a su pùbblicu un'ocasioni po si cunfrontai cun s'autora in pitzus de unu tema chi atressat generatzionis e territòrius: sa partèntzia de is fìllus, sa circa de oportunidadis e is cunsighèntzias de una distàntzia chi càmbiat sa vida de dònnia dii de chini andat e de chini abarrat.
In su lìbburu, Ferrario atritzat s'esperièntzia personali de mamma cun sa mirada de s'inchesta giornalìstica. Su raportu cun su fillu atesu ndi bessit su puntu de partèntzia pro arregolli àteras boxis e s'interrogai asuba de is arrexonis chi spingint giòvunus meda a circai traballu, autonomia e prospetivas in àterus logus.
Acanta a is aspiratzionis de chini partit ndi bessint a pillu is sentidus de chini abarrat: s'orgòlliu in su percursu de is fillus, sa nostalgia, su disìgiu de cumpartziri sa vida de dònnia dii, difitzili po su fatu ca funt atesu. De custas esperièntzias pigat forma un’arrexonamentu in pitzus de is oportunidades chi s'Itàlia oferit a is generatzionis nobas e asuba de is responsabilidades de unu Paisu chi iat a depi imbestiri in su benidori pròpiu.
S'atòbiu de Siddi at a portai custas preguntas in su coru de sa Marmidda, aberrendi unu spàtziu de ascurtu e cunfrontu asuba de chistionis chi funt acanta fintzas a is comunidadis de sa Sardìnnia: su liòngiu cun is logus de orìgini, sa possibbilidadi de sceberai innui bivi e su valori de is arrelatas intre generatzionis.
A sa presentada s'at aciungi sa letura dedicada a “Su movimentu elementari” de Fabiano Alborghetti, insertau in su percursu poèticu de Marmillibri.
S'atòbiu intre cunversatzioni e letura a boxi arta est unu de is elementus chi caraterizant custa de cuàturu editzionis de su fèstival. Is leturas e is laboratòrius de letura a indonu invitant a su pùbblicu a bivi is lìbburus fintzas a traessu de sa boxi, s'interpretatzioni e su cumpartzimentu.
Pustis de is tapas de Pauli Arbarei, Biddanoa Franca e Forru, Marmillibri 2026 sighit su suo tretu in is 16 comunus de sa Marmidda, cun d-unu programa chi at a sighiri finas a su 11 de su mesi de idas. Atòbius cun is autoris, leturas poèticas, fainas po is scolas e bìsitas a is museus ponint in arrelata sa promotzioni de sa letura cun sa scoberta de su territòriu.
Sa manifestada est promòvia de s'Unioni de is Comunus Marmidda, cun s'amparu de sa Regione Autònoma de Sardigna, sa collaboratzioni de sa Fundatzione Altura de sa Giara e de sa Fundatzioni Biddanoa Franca, s'organizatzione de AEL e sa diretzioni artìstica de Giovanni Follesa.