SARDU
Tres spetàculus intre sàbudu 7 e domìnigu 8 de donniassantu 2026 in su Tzineteatru Comunali de Sàrdara po sa serrada de sa de cuàturu editzionis de sa rassìnnia «Tretus de vida in Teatru» de Nakka Naranta. A su sàbudu funt in programma «E poi ne rimase uno» e «SENTImenti», mentras domìnigu sa rassìnnia s'at a serrai cun «Cannas a Bentu».
Su primu atòbiu est sàbadu 7 de donniassantu a is 19:00 cun sa classi Scirone, chi at a portai in iscena «E poi ne rimase uno», pigau in manera lìbera de s’ arromanzu Dexi indianus piticus de Agatha Christie. S'arrangiamentu e sa regia funt de Francesca Cabiddu e Andrea Vargiu. Sa stòria acontessit in d-una villa chi est in d-un'ìsula atesu de sa terramanna, aundi una truma de genti chi no si connoscit cumintzat a suspetai is unus de is àterus candu ndi bessint a pillu is segretus de su passau.
A is 21:00 ant a artziai apitzus de su palcu is classis Apeliote e Borea cun «SENTImenti», scritu e dirìgiu de Francesca Cabiddu e Andrea Vargiu. Su spetàculu sighit is arregordus de Marta de sa pipiesa a s'edadi adulta. Is sentidus pigant boxi subra in sa scena e acumpàngiant sa protagonista in is cambiamentus chi dda portant a connosci mellus issa etotu.
Sa rassìnnia s'at a serrai domìnigu 8 de donniassantu a is 18:00 cun «Cannas a Bentu», portau in scena de Nakka Naranta. Un’arrangiamentu de s’arromanzu de Grazia Deledda scritu e dirìgiu de Francesca Cabiddu e Andrea Vargiu cun is coreografias de Anna Scintu, is bortaduras in sardu funt a incuru de Marta Ibba.