SARDU

Comunu de Aristanis: Is rapresentantis de su Comunu de Aristanis, de sa Fundatzioni Aristanis, de s’Istitutzioni Sa Sartíglia, de is Grémius de Santu Giuanni e Santu Giusepi e de s’Assótziu Cavalieris si funt atobiaus custu mengianu a Palàtziu Campus Colonna po esaminai una proposta cumpartzida po fai sa Sartíglia 2022.

S’idea bessida a pillu est cussa de unu programa prus curtzu in duas dis, domínigu 27 de friaxu e martis 1° martzu, innoi ci siat sa vestitzioni de is componidoris me is sedis de is duus Grémius, in bia Aristana e bia Solferino, sa sfilada de is cavalieris fintzas a sa bia Duomo, sa beneditzioni de sa citadi e su gruxeri de is spadas.

“Scieus totus beni sa dificultadi de custu tempus – narat su Síndigu e Presidenti de sa Fundatzioni Aristanis Andrea Lutzu -. S’evolutzioni de sa pandemia dónnia diri si portat una cunditzioni de dificultadi manna po su númunu de is contàgius, po cussu de is mortus, po sa dificultadi de su sistema sanitàriu. Po custa arrexoni, cun dispraxeri mannu, cumprendeus ca no at a èssiri possíbili a fai una Sartíglia comenti sa traditzioni secolari s’at lassau. Credeus però ca, chi sa situatzioni sanitària no at a tènniri una evolutzioni negativa, ci siant is cunditzionis poita si potzat propònniri a sa citadi unu programma ca, arrispetendu is arrégulas de siguresa, permitat de annoai s’apuntamentu cun sa traditzioni”.

Comunu, Grémius, cavalieris e Istitutzioni Sa Sartíglia cuncordant po custa idea e me is dis chi sighint ddant a fai connòsciri a su Prefetu e a su Cuestori po incarrerai pustis una definitzioni eventuali de su progetu ca ddi pertocat ca s’at a dèpiri ispirai a s’arrispetu prenu de is arrégulas de siguresa.