sardu
Domìnigu su 27 de cabudanni 2026 su tzentru stóricu torrat a si animai cun sa de 29 editzionis de sa Festa de su Burgu, una intra is manifestatzionis prus intèndias e sighias, nàscia cun sa tenta de torrai a scoberri e aguantai bia sa traditzioni de su burgu antigu de Seddori.
In totu sa dii is bias de su tzentru stóricu, is domus antigas, s’impedrau, is funtanas pùbblicas e is lollas ant a diventai su scenàriu de unu biaxi in su passau, po scoberri una Seddori chi unu tempus fiat ingiriada de murallas e si podiat imbucai scéti de is 4 portas de intrada a su burgu: sa prus connota est sa “Porta de su Casteddu”, is àteras funt “Sa Portisedda”, “Su Portalleddu”, “Sa Porta Noba” chi oi ancora funt is is intradas a su tzentru stóricu.
Sa Festa de su Burgu at a essi un’ocasioni po truessai custus logus e ndi torrai a scoberri sa stória gràtzias a is mestieris antigus, is giogus chi si faiant unu tempus, sa mùsica traditzionali e is ricostrutzionis de vida fitiana capassus de si fai bivi po una dii in su Burgu is atmosferas e is gestus de sa Seddori messaja de unu tempus.
Un’atentzioni particolari s’at a donai a scoberri is currungonis prus pagu connotus de su tzentru stóricu, de is funtanas antigas e de is lollas, gràtzias a percussus e contus chi ant a permiti de connosci sa stória, is crosidadis e is paristórias acapiadas a custus logus.
«Cun mannosia apariciaus una borta ancora sa Festa de su Burgu – spiegat su sìndigu Alberto Urpi – Est un’apuntamentu chi si permitit de torrai a scoberri su passau nostu e unu tempus chi non nc’at prus, ma chi arrapresentat is arrèxinis nostas. Est unu momentu de arregodus po chini at bìviu cussa Seddori e, a su própiu tempus, est un’ocasioni de scoberta po is prus giòvunus. Totu custu gràtzias a is logus, is contus, is mestieris antigus e sa cosa de papai bona de sa traditzioni nosta».
Un’àteru protagonista est su Civraxu, su pani tìpicu de Seddori, cun sa de 8 Sagras dedicada a su pani tìpicu de Seddori.
In s’interis de sa festa s’at a podi scoberri e connosci totu sa filera de su pani, de sa coltivatzioni de su trigu a su trabballu suu, de sa cummossadura de s’impastu a is modalidadis de axedadura fintzas a sa cotura, cun is gestus e is técnicas de sa traditzioni.
Is tastaduras ant a acumpangiai su percussu de connosciéntzia, permitendi de torrai a scoberri su Civraxu non scéti che a prodotu de sa traditzioni gastronómica, ma cumenti a elementu acapiau a fundu a sa stória, a sa cultura e a sa vida fitiana de sa comunidadi seddoresa.
Su sìndigu fait un’apellu a is seddoresus de su tzentru stóricu: «Oberri is portalis de is domus nostas bolit nai a agiudai a fai diventai prus verdadera ancora custa festa. Sa Pro Loco e s’Amministratzioni Comunali funt a disponimentu po donai s’agiudu chi serbit a chini at a bolli partetzipai e ponni a disponimentu is spàtzius suus».
Po su presidenti nou de sa Pro Loco Seddori, Alessandro Basciu, sa de 29 editzionis arrapresentat «Una raja de importu, cun su significau dópiu de prommovi Seddori e livellu turìsticu e, a su matessi tempus, de si permiti de aguantai bias is traditzionis nostas e ddas fai connosci a is prus giòvunus».
Is diis innatis de sa Festa de su Burgu s’ant a fai unus cantu apuntamentus dedicaus a fai connosci is traditzionis localis. Su cenàbara at a essi dedicau a su tema de su pani, fintzas cumenti alimentu, su sàbudu at a essi protagonista un’acontéssiu sportivu in su tzentru stóricu chi at a permiti a is partecipantis de connosci su Burgu e sa stória sua.
Sa partecipatzioni a sa Festa de su Burgu est oberta puru a is esponidoris, hobbistas e assótzius chi bolint contribbuiri a sa manifestatzioni.
Po aderiri ddoi at tempus fintzas a su 12 de cabudanni 2026, intreghendu su mollu de domanda a sa Pro Loco Seddori a s’indiritzu email prolocosanluri@gmail.com o andendi a sa sea de sa Pro Loco de su lunis a su cenàbara de is 6 de a mericeddu a is dexi de noti (h. 18-22).