???????: ????? ?? ?? ????? ????

Su Comunu de Seddori e sa Proloco cumbidant a totus a sa de 28 editzionis de sa Festa de su Burgu e de sa Sagra de su Civraxu.
Is chi bivint in su burgu, in collabboratzioni cun is assótzius tzitadinus, ammostant s’arti de strangiai cun tastaduras e ponendi a disponimentu is lollas campidanesas caraterísticas.
Su papai e su bufai funt realizaus sighendi is arretzetas prus antigas.

A su tzentru stóricu s’imbucat de is 4 bias innui antigamenti ddoi fiant is portas de su burgu: sa Porta de su Casteddu, Porta Noba, Sa Muralla, Portaleddu.

S’intrada est a indonu.

Aintrus s’agatant is maistus butegheris, de linna, picapedreris, ferreris, ceramistas e scarteddajus chi si ammostant a su púbblicu faendi biri s’abilesa insoru e spainendi is connosciéntzias chi tenint

A chini at a bandai a sa Festa de su Burgu at a torrai agoa in su tempus po torrai a scoberri su passau, is traditzionis, is saboris, is nuscus de sa vida antiga. 

Sa Festa de otu annus acumpàngiat sa Sagra de su Civraxu chi punnat a avalorai su pani traditzionali de Seddori e de ndi fai scoberri sa stória, cumenti si trabballat (fintzas cun is labboratórius) e su nuscu suu (tastendi.ddu puru)

Is bias cuncordadas ant a contai sa stória de is famíllias chi nci biviant e de is mestieris e is usàntzias de unu tempus.   

A chistionai de civraxu e de pani nci at a essi sa presentada de unu líbburu e sa relata de un’espertu de fai su pani. 

A contai de is momentus de festa de una borta ddoi at, po nai, sa ricostrutzioni de is fràsias chi si impreànt po si cojai, de su fastígiu, a sa serenada a su corteu cun su pannamentu de is sposus. 

Peri is bias ammostus de is mestieris antigus, ammostu de is produtus artesanalis e starias e logus innui si papat cun is pratus típicus de sa traditzioni de is messajus. 

Passillendi peri is bias imperdadas is grupus folk, is sonetus e sa banda.

E ancora ammostus, butegas artesanas, lollas abertas e bisitas a is museus. 

Si podit puru partetzipai a sa estemporànea de pintura e a su contest fotogràficu. 

Is hobbistas e is assótzius chi bolint ponni in ammostu e partetzipai a s’acontéssiu podint presentai sa domanda a sa Pro Loco.
Link  https://forms.gle/MtW8bsXbcHAMoX6A6