SARDU
Tres diis dedicaus a sa letura, ma prus de totu a s’atóbiu deretu cun chini cussus librus ddus at scritus. Is studiantis de s’Istitudu comprensivu de Seddori ant a tenni sa possibbilidadi de atobiai is autoris de is stórias chi ant lìgiu in iscola, ascurtai cussas stórias in deretura de sa boxi chi ddas at pentzadas, is speriéntzias e is bideas chi ant fatu nasci is librus e chistionai cun issus fendi.ddi preguntas e cunfrontus.
Unu percussu promóviu de s’Amministratzioni comunali, in collabboratzioni cun s’Istitudu Comprensivu, sa Biblioteca Gramsciana e su Féstival de sa Literadura po Piciocus “Tuttestorie”, chi ingollit is autoris in deretura in is iscolas e in is logus de cultura, faendi diventai sa letura una speriéntzia verdadera de atóbiu e partecipatzioni.
Mércuris su 7 de Mesi de Ladàmini a is 9.00 oras, in su Teatru Akinu Congia, unus 200 studiantis de totus is classis de sa scola segundària de primu gradu ant a atobiai a Ibrahima Lo. S’atóbiu est cordinau de Giuseppe Manias de sa Biblioteca Gramsciana.
Ibrahima Lo est lómpiu a Italia de su Senegal in su 2017, pustis de unu biaxi longu drammàticu. Oi stùdiat e trabballat in Venétzia e bolit diventai unu giornalista po donai una boxi a is chi non dda tenint. Est autori de “Pane e acqua (2021)” e “La mia voce – Dalle rive dell’Africa alle strade d’Europa (2024)”, ambeduus imprentaus de “Villaggio Maori”. Sa stória sua at ispirau su film “Io capitano” de Matteo Garrone.
Is duas diis apustis sa Biblioteca comunali stràngiat su Féstival de sa Literadura po Piciocus “Tuttestorie” cun atrus duus apuntamentus dedicaus a is studiantis e a sa possibbilidadi de atobiai e chistionai diretamenti cun is autoris pustis chi ant lìgiu is librus insoru.
Giòbia s’8 de Mesi de Ladàmini, a is 9.00 oras, is classis segundas de sa scola segundària atòbiant a Fabrizio Altieri, autori de “Lasciate ogni speranza (Piemme)”, unu romanzu de aventura ispirau a s’Inferru de Dante.
Cenàbara su 9 de mesi de Ladàmini, sempri a is 9.00 oras, is classis cuartas de sa scola primària atóbiant a Bruno Tognolini, nàsciu in Casteddu e “Poeta de su Féstival Tuttestorie”, cun s’arregorta de poesias “Rima rimasta (Salani)”.
Is apuntamentus de su Féstival funt cordinaus de sa bibliotecària Patrizia Congia e de is maistus de is classis interessadas. Is studiantis, difati, lompint a is atóbius pustis chi ant giai lìgiu su libru de s’autori, est una manera de partecipai in manera ativa a su cunfrontu, cumpratziri pentzamentus e fai is preguntas in deretura a chini cussas stórias ddas at scritas.
«Creeus meda in sa promotzioni de sa cultura e in su balori mannu de is librus e de sa letura, pruschetotu po is prus gióvunus – spiegat su Sìndigu Alberto Urpi –. Investiri in sa literadura bolit nai donai a is piciocus nostus ainas po cumprendi su mundu. A ddu fai in arretza cun sa scola e cun is realidadis de su territóriu est, pentzaus, su scioberu mellus po fai cresci una comunidadi.»
«Seu prexau de podi sighiri unu percussu nàsciu dexi annus a oi cun una bidea precisa: unu libru lìgiu in iscola pigat balori diversu candu is piciocus si podint cunfrontai cun chini dd’at scritu – narat Carlo Murru, Assessori a is Polìticas Scolàsticas e Sportivas –. Ocannu su “Féstival Tuttestorie” si acostat a s’atóbiu cun Ibrahima Lo, chi at a portai a is studiantis nostus una stória verdadera, contada in primu persona. Seu siguru chi po issusu at a essi unu momentu de partecipatzioni mannu e de pentzamentu.»