SARDU
Comunu de Seddori: Fonti: "La Gazzetta del Medio Campidano": Nàscia in Germania ma nadia in Sardigna e residenti in Seddori Stadu, Annelise Atzori est un’artista a 360 gradus connota in totu su mundu. Pintora, scultora, gràfica, poetessa, artista de mosàicus, diplomada in s’Accadèmia de Belle Arti, at fatu mustras in totu su mundu: de su Canada a s’Inghilterra, de New York a su Brasile, passendi po s’Itàlia e is aposentus de su Vaticano e de su Quirinale. Po sa carriera artìstica sua, cun s’òpera “Verde petrolio”, at arriciu su arreconnoscimentu de prestìgiu “Oscar de sa creatividadi 2021”, prèmiu biennali chi dd’at donau su 16 de ladàmini de s’annu passau, in Montecarlo, una giuria de crìticus internatzionalis, po sa manifestatzioni Artexpogallery, a sa cali s’artista at partetzipau cun is òperas “Verde petrolio” e “Autoritratto – i gioielli”.
Calis est su raportu suu cun s’arti?
Su raportu miu cun s’arti, de candu m’arregordu, inghitzat candu tenia cincu annus. Est stètia una sorti manna a tenni unu babbu e una mamma chi creiant in mei, pruschetotu babbu. Deu no seu un’artista casuali ma traballu dònnia dì e mi organziu tra pintura, scritura, sartòria, mosàicus, calincuna cosa de fai dd’agatu sempri. S’arti mi atzisat e is fundamentus de s’arti mia funt innovatzioni e originalidadi: de mei nascint cosas noas, sa creatividadi mia est chena de coru. Mi donat totu sa menti cosa mia e candu creu calincuna cosa, cussa cosa depit spantai po primu a mei, seu assortada poita ca is creatzionis mias spantant puru is atras personas. S’arti mia est intzetada. Su chi fatzu praxit a medas e de custu ndi seu prexada meda mancai deu pentzu sempri innantis a mei e mai a is atrus. Candu fatzu arti, deu nci pongu s’ànima e si ddoi est s’ànima, ddoi at calincuna cosa in prus.
Si podit contai unu episòdiu tra is mustras d’arti chi at fatu e a is calis at partetzipau ca arregordat cun praxeri mannu?
Su 2 de argiolas de su 2021 ddoi est stètia una seletzioni po partetzipai a una mustra in Roma po contu de sa Global Arte, apu partetzipau cun d-unu donu a Fellini ispirau a su film “La strada”, funt duus cuadrus chi acostaus ndi faint unu sceti, òpera chi ia giai presentau in su 2019 in ocasioni de “Le Notti Felliniane”. Seu stètia seletzionada e cust’òpera at tentu una resessida manna: fia in su palatzu de su Vicariau Vaticanu. Sa mustra dd’at presentada Vittorio Sgarbi chi, de totus is artistas presentis, ndi at nominau sceti calincunu, deu fia tra cussus: po meis est stètiu cumenti una cunsagradura.
Me is mesis chi benint at a essi imprendat in s’aprontadura de unu film, si podit scoviai calincuna cosa in antìcipu?
Est unu docu-film de su tìtulu “Le perle del Veneto” prodùsiu de “Ondamovie Film”. Eus presentau su teaser a sa de 78’ Mustra de su Tzìnema de Venezia una pariga de mesis fait, a s’Italian Pavilion de s’Istitutu Luce de Cinecittà. Su film tenit cumenti a argumentu cussu de chistionai de is 4.500 villas de su Veneto. Deus seu stètia scerada po sa scenegiatura e po sa consulèntzia artìstica, mi pertocat puru sa parti de is bistiris chi funt giai totus creatzionis mias, e me is mesis afatantis eus a inghitzai is ripresas: at a essi puru sa mia prima borta in sa regia.
Su 2022 at a essi po fustei unu annu arricu de eventus importantis, tra custus ddoi at s’apuntamentu a s’Expo de Dubai.
Eja, su 2022 at a essi unu annu innoi s’ant a aprontai progetus medas po su benidori. Sa pròssima publicatzioni est una antològia de su “Club letterario del lunedì” de Roma, de su cali fatzu parti e innoi ddoi funt puru medas contributus mius. A martzu ddoi at a essi s’Expo universali de Dubai 2021/2022 innoi apa a pigai parti cun s’òpera mia “Lo specchio”. A pustis, ddoi at a essi sa presentatzioni de su libru “Protagonisti del tempo d’arte”, unu catàlugu chi at a essi presentau s’8 de làmpadas in s’aposentu de su Senatu de sa Repùblica, innoi si chistionat de mei e de s’arti mia in sa setzioni “pittura”. Custa est sceti una parti de is apuntamentus inditaus in calendàriu, ma is novidadis funt medas.