Sàbudu 28 e domínigu 29 de Làmpadas Seddori torrat agoa in su tempus cun sa de 14 editzionis de s’arregodu stóricu de “Sa Batalla” de su 1409. Sàbudu su 5 de Meseargiolas invécias, at a aprofundai is temas de su Medioevu su giornalista e spainadori televisivu Aldo Cazzullo.
Sa parti prus importanti abarrat s’ammentu stóricu de “Sa Batalla”, cumbatimentu in su campu intra is sardus de su Giudicau de Arborea ghiaus de Guglielmo III de Narbona e is cadelanu-aragonesus de s’erederi a sa trona Martino II. Ant cumbàtiu in su sartu de Seddori, in sa localidadi connota cumenti a “Su Bruncu de sa Batalla”. Iant bintu is aragonesus chi iant spérdiu s’esércitu sardu in sa localidadi “S’ocidroxu”.
S’ammentu stòricu s’at a fai própiu ingunis, in localidadi “Su Bruncu”, innui in su 1409 iant spérdiu s’esércitu sardu.
Centinas meda de figurantis intra cuadderis asuba de is cuaddus, arceris, armaritzus, populanus e nóbbilis, totus bistius cun bistiris medievalis, ant a torrai a fai bivi unu momentu de importu de sa stória sarda e italiana. A una parti s’esércitu de Arborea ghiau de Guglielmo III de Narbona at a abetai de unu cucureddu s’arribbu de s’esércitu aragonesu ghiau de Martino II allomingiau “su gióvunu” chi, lompendi de Casteddu, at a andai oru-oru de su frúmini Mannu. S’esércitu sardu dd’ant a ingiriai, Martinu at a tenni vida fàcili e at a lompi bincidori a su Casteddu po s’afracada a is murallas fortificadas de Seddori. Intra is novidadis de ocannu una filera de momentus interpretaus de atoris professionistas (in su Casteddu) chi ant a permiti a su púbblicu de cumprendi mellus is acontéssius chi ant portau a sa Batalla e is cosseguéntzias suas. Sa regia de custus momentus est a incuru de Marco Spiga.
Chini si bolit gustai totus is momentus de s’ammentu stóricu, podit comporai unu billetu po si setzi in is tribunas siat po s’arremonu (Su Bruncu, boxi chi contat de Eugenio Lobina) siat po s’afracada a su casteddu (boxi chi contat de Gianni Mereu).
Su sàbudu incumentzat cun sa missa po arregodai is mortus in sa batalla e sighit cun unu cunvegnu meda interessanti chi tenit cumenti a reladoris Giovanni Serreli e Gianni Mereu e, po acabbai sa serada, su cuncertu de su “Complesso a Fiati Ponchielli”.
Domínigu prenu intra consillu comunali solenni, bisitas ghiadas, corteus stóricus e bistiduras e investiduras de is cuadderis.
Sa parti prus importanti cumintzat a is h. 17.30 cumenti eus giai nau.
Sàbudu (a cumentzai de is h. 18.00) e domínigu, su parcu comunali S’Arei s’at a mudai in unu acampamentu medievali beru cun atividadis didàticas, lúdicas e àteras atividadis asuba de sa vida de cussu tempus.
“Sigheus a fincai asuba de su turismu stóricu e culturali – narat su síndigu de Seddori Alberto Urpi – Sa batalla de Seddori est un’acontéssiu chi at caraterizau meda sa stória de Sardigna, est stétiu unu momentu de importu mannu de su Medioevu in su Mediterràneu, chi at interessau e cambiau is bisuras geo-políticas de apustis. Ocannu eus aciuntu elementus nous, in prus de s’arremonu in su campu e in su casteddu nci funt momentus recitaus po cumprendi mellus sa batalla. Sa Batalla est unu momentu de stória de totus is sardus e duncas est importanti a dda connosci”.
A Sa Batalla pigant parti unus 25 assótzius chi ndi benint de totu sa Sardigna e unas dexina de assótzius seddoresus chi collàbborant po is apuntamentus e sa logística.
S’acontéssiu dd’at organizau su comunu de Seddori, in collabboratzioni cun sa Pro loco, Assótzius Entis Localis, su Cedac e is assótzius seddoresus.
Billetus postus a si setzi
Chini bolit comporai is billetus po unu logu sétzius depit cuntatai sa Pro Loco. Ocannu si podint comporai fintzas in-línia.
Contatus
prolocosanluri@gmail.com
353 3734663 – 339 3914427
Po ddus comporai in-línia
Tribunas in Su Bruncu De Sa Batalla: https://bit.ly/4e3OBK4
Tribunas in su Casteddu: https://bit.ly/4e8Spd1

????????? ????????:

?? ?? ??̀??????, ??̀????

- h. 18.00, Abertura acampamentu medievali, Bistidura e Investidura de is Cuadderis in su Parcu Comunali S’Arei
- h. 18.30 Missa po arregodai is mortus in sa Batalla in sa Crésia de Santu Larentzu.
- h. 19.30 Cunvegnu “Sa Battalla” in sa Corti aintrus de su Casteddu
Saludus istitutzionalis de Alberto Urpi, síndigu de Seddori
Introdusit Luca Puddu diretori de su Polu Museali de Seddori
Reladoris Professori Giovanni Serreli, circadori de s’ISEM CNR
“Sanluri 1409 quale battaglia?”
Gianni Mereu studiosu seddoresu espertu de “Sa Batalla”
Su “cropu de stadu secessionista" chi at sinnau s’acabbu de su Stadu giudicali de Arborea (e ammostu de is documentus interessaus)
- h. 21.30 in Pratza Castello “Complesso strumentale a fiati “Ponchielli”
Cuncertu de abertura “Sa Battalla”
Ghiat su maistu Paolo Argiolas
Presentat Annamaria Vinci

?? ?? ??̀??????, ????́????

- h. 10.00 in su Casteddu Consillu Comunali solenni
- h. 11.00 in su Tzentru Stóricu Bisita ghiada po scoberri is targas apitzus de is feudatàrius de Seddori, a incuru de Gianni Mereu
- h. 11.45 in su Casteddu, Corteu stóricu cun damas, armaritzus, cuadderis e populanus.
Si partit de su Casteddu e si percurrint bia Nino Villasanta, bia Castello, bia A. Riva Villasanta, bia Carlo felice, bia Azuni fintzas a lompi a s’acampamentu militari de su Parcu S’Arei.
- h. 12.30 in su Parcu S’Arei Bistidura e investidura de is Cuadderis
- h. 17.30 Ananti de su Casteddu “Prologo Sa Batalla” (regia a incuru de Marco Spiga)
- h. 18.15 in Su Bruncu de sa Batalla Atóbiu intra Martino “su gióvunu” e Guglielmo de Narbone: sighit su Cumbatimentu in su campu de is sordaus a cuaddu, arceris e cuadderis (sa boxi chi contat est de Eugenio Lobina), agoa in sa Pratza Castello si fait s’Afracada a su Casteddu fortificau (sa boxi chi contat est de Gianni Mereu). Acabbu (regia a incuru de Marco Spiga).

? ?? ????????????, ??̀????

h. 21.00 in su Casteddu, Fueddada cun su giornalista Aldo Cazzullo “Da Sa Batalla a Dante, la nascita di una patria”