SARDU

Comunu de Serrenti: Sighint is atóbius … su Grupu de letura “Il Sentiero dei Libri” si reunit una borta a su mesi in is aposentus de sa Biblioteca Comunali.  S’atóbiu avatanti si fait su 6 de Donniasantu 2019 in Biblioteca, a is cuatru de a merí (16,00), in su Tzentru Polivalenti de bia Fara.

Chini bolit fai parti de su grupu ddu podit fai in calisisiat momentu, podit detzídiri puru de mancai a unus cantu atóbius e torrai a abbitai apustis cunformas a su prexeri e a s’abbisóngiu de donniunu. Su líbburu po su mesi de Meseladàmini 2019 est “La parte migliore” de Christian Raimo.

Su líbburu

Christian Raimo scrit unu líbburu, “La parte migliore”, innui is figuras femmininas funt mellus cunfrontas a is personàgius masculinus. Leda, corantacinc’annus, est una psicòloga chi agiudat is malàdius chi funt a sa fini, intamis sa filla  Laura, andat ancoras a su litzeu e est acanta a fai 18 annus. Non funt simpàticas dónnia momentu, antzis ponendusí in is pannus de is àterus, fatuvatu faint arrennegai, ca fait scioberus chi non sémpiri si podint cumpartziri.

Si Leda est brava in su trabballu cosa sua, in sa vida est a unu puntu mortu, fait fatiga meda a si intendi ancoras arranguitza e ecisera cun is óminis chi si ddoi acostant. Tenit unu segretu orrorosu chi non dda fait essi firma de ciorbeddu: at pérdiu unu fillu, Adriano, chi teniat cincu annus, unu corpu diaici forti chi non dd’est mai torrada. Apustis de s’esperiéntzia tràgica, Leda divortziat de su pobiddu e si nci ghetat a trabballai a coddu prantau. Laura intamis est una piciochedda atzicada, chi cuat su pentzamentu cun sa barra. Seus in Roma, chi Raimo ammostat che una tzitadi innui est difitzili a bivi, su tràficu, is disterraus in circa de sorti bona, is postalis chi non passant, sa genti chi tratat a is àterus cumenti a pantasimas. Roma che logu de indiferéntzia, prena de genti cun  vidas provisórias e de pagu contu.

Leda cumbatit cun sa morti totus is dís e in prus ddi tocat a nai a  parentis e amigus cantu abarrat de bivi, a chini non est ancoras mortu. Laura intamis arrespundit a sa vida cun spreni, po no abarrai arréscia in’arretza de is pentzamentus maternus. In s’interis de una festa Laura andat a letu cun Giorgiu chentza  nisciuna prutetzioni, funt imbriagus ambaduus e issa abarrat príngia. Funt duus piciocus, non tenint sa possibbilidadi de podi fai una famíllia. In s’interis su babbu de Laura, Giuseppe, si torrat a acostiai a sa filla po dda connosci mellus, ddi scrit una lítera bella meda chi fueddat de Adriano, su fillu chi non c’est prus. Raimo in is úrtimas pàginas fait arrui asuba de is personàgius una spécia de gràtzia, de libberatzioni bófia de fortzas chi non guvernaus.

De su giassu:/www.sololibri.net