SARDU

Comunu de Serri: Fonti "L'Unione Sarda": Gràtzias a fundus regionalis e de s’arrestu de amministratzioni intra de pagus mesis su comunu de Serri at a pòdiri incarrerai cuatru progetus in totu de 700 milla éurus. Duxentusmilla éurus ant a èssiri impreaus po s’apariciadura de su museu archeológicu cun is repertus agataus in s’interis de is campànnias de sgavu in su santuàriu nuràgicu de Santa Vitória e in su territóriu. Cun is duxentusmilla de su Pianu stratégicu territoriali ant a èssiri bogadas is barrieras architetónicas e pigaus is arredus. Su museu at a èssiri apariciau in su centru servítziu, in sa bia intra sa bidda e s’àrea archeológica. Po sa sistematzioni de is bias de sartu, innoi s’at a traballai puru po s’allichididura de is cunetas po permítiri su passai de s’àcua, ant a èssiri impreaus 70 milla éurus, àterus 42 milla po amanniai su campusantu, fadendu servítzius e lóculus nous e a cussus si aciungint 160 milla éurus de parti de sa Regioni.

Infinis trintasesmilla éurus ant a èssiri impreaus po sa ricualificatzioni de s’ingruxeri intra bia Marconi e bia Muntoni in su centru stóricu, cun una pratzixedda e marciapiedis nous. “Funt cuatru progetus de importu po sa comunidadi”, at nau su síndigu Samuele Gaviano, “ca ant a inghitzai intra de beranu chi benit”