SARDU
Comunu de Gùspini: S'Assótziu sportivu "Mediterranean Team" imparis sun su "AC Cagliari", de su "Ogliastra Racing" e s'agiudu de sa "Arbus Promotors", funt trabballendi po su " 2° Rally de su Parcu Geomineràriu de sa Sardigna chi si fait su 18 e su 19 de Maju 2019.
Sa manifestada passat de "Rally Day" a "Rally" Natzionali chi balit po sa Copa Itàlia de Zona.
Sa serrada a sa tzirculatzioni de sa strada provintziali 66, previdia po su 19 de Maju, non permitit s'abbisita de sa miniera e duncas su 19 de Maju non si podint fai is abbisitas sólitas a su cumplessu mineràriu.
Sa prova "Gùspini-Montibéciu" ocannu est prus longa de su passau de 2,600 km. Noba, intamis, sa prova de "Cortes" cun unu camminu mistu-lestru, chi partit de is peis de sa bidda de Arbus e acabbat acanta de sa parténtzia de sa prova de "Arbus" chi est cunfirmada de unu totu e chi est allonghiada de àterus 450 metrus, cun unu spantu a s'acabbu. Is tres provas tocat a ddas arrepiti tres bortas, in totu 9 (noi) provas cronometradas po 61,65 Km, a fronti de totu su camminu chi ndi mesurat 141,14.
S'arribbu de is echipàgius po is atividadis ainnantis de sa gara est previdiu in Gùspini in bia Boccaccio ( a su costau de su Campusantu) innui nc'est sa zona carrellus. Is averiguadas sportivas e ténnicas si faint in s'Istitutu Scolàsticu "S.Satta", cun intrada de bia Marconi (zona carrellus avatanti), a s'acabbu de is averiguadas sàbudu a merí, de is seti e mesu de a merí (19,30), est previdiu s'inghitzu de sa tzirimónia de Parténtzia, cun su càmbiu de sa màchina de sa zona carrellus de bia Boccaccio, fintzas a su palcu de Pratza XX Settembre, innui is echipàgius sfilant ananti de is autoridadis e arritzint un'arregordeddu de sa partitzipatzioni.
Passaus de su palcu de parténtzia, is cuncurrentis torrant a sa zona carrellus de bia Boccaccio, innui acabbant is impínnius de sàbudu 18 de Maju.
Domínigu a mengianu is assisténtzias podint intrai a su Parcu Assisténtzia chi s'agatat in Gùspini, in bia Montale (assi medianu de sa parti de sa ASL) de is seti e mesu de a mengianu (07,30).
Is echipàgius podint lassai su parcu assisténtzia, de is dexi de a mengianu (10,00),
po andai a zona de parténtzia de sa gara chi s'agatat in Arbus, in "Via della Pineta", ananti a s'anfiteatru comunali.
Po s'editzioni 2019, s'est detzídiu de intregai su trofeu "Miniere e Dune di Piscinas" a s'echipàgiu chi fait su cammnu in prus pagu tempus, arrelatau a s'aciunta de is tempus fatus in is tres passàgius in sa Prova Spetziali 1/4/7 Gùspini-Montibéciu.
Po àteras sceras si podit castiai su giassu ufitziali de su rally
intra de is àteras cosas si podit agatai:
Ghia po is spetatoris
Descritzioni e videu de is provas spetzialis
Su programma cun totus is piessignus.