SARDU
Comunu de Teulada: Su 8 de Meseladàmini 2020, in su giardinu de sa Domu Baronali, in pratza de Crèsia, a is ses de a merí, nc'est sa presentada de su líbburu: “Lentores” de Anna Cristina Serra.
S' autora (fonti: it.wikipedia.org)
Nàscia e pesada in Santu 'Asili 'e Monti, immui bivit in Casteddu cun is duus fillus, Silvia e Francesco. At inghitzau a scriri giai po giogu, in su 1992, po unu prémiu apariciau in domu sua ma apustis at pigau parti a totus is prémius literàrius de prus importu de s'Ísula.
At pubricau cun sa domu de imprenta "Tema", s'arregorta "Su Fragu 'e su entu" chi at bintu su prémiu "Mialinu Pira" de su 1996. Cun "Edizioni Frorias" in su 2003 s'arregorta de poesias "Follas" (dedicada a su Maistu Benvenuto Lobina), cun sa Edes, in su 2010, a incuru de Nicola Tanda, "Luna Cantadora" poesias non pubricadas, e cun sa domu de imprenta "Soter", "Lentores- Rigiade- Δροσίάί" cun tradutzionis in aregu e in italianu. Su nómini cosa sua s'agatat in medas antologias de poetas e scritoris sardus, po nai: "Lingua Madre Sarda", "Bentu de Terra Manna" o "Un'Odissea de rimas nobas". Unus cantu de iscritus cosa sua ddus ant portaus in música Ambra Pintore, Franco Madau e Pino Martini.
At fatu parti de medas giurias de cuncursus literàrius, intra de custus: "Premio Fiscali", "Premio Internazionale di Milano", "Premio Città di Tempio", "Premio Ozieri", e àterus ancoras.
At furriau in sardu "Una donna" de Sibilla Aleramo.
At scritu duas òperas po su teatru, "Alientu" in su 2004 e "Lionora, una visioni" in su 2007 portaus in scena de sa cumpangia teatrali "Fueddu e gestu" de Biddesorris. Sémpiri in su cuntestu de su teatru, at trabballau imparis cun Maria Lai po apariciai una rapresentatzioni de "Miele Amaro" de Salvatore Cambosu.
At scritu puru un'òpera a caràtiri scientíficu "Bellebbatu" , una circa asuba de is fueddus localis de sa bidda de Santu 'Asili 'e Monti, chi at pubricau sa domu de imprenta "Domus de Janas".
Est stétia presidentissa annus de s'assótziu culturali "Galania" e at trabballau imparis cun esponentis famaus de s'arti e de sa cultura sarda a s'organizatzioni de acontéssius, cunferéntzias, cunvénnius, ammostas e presentadas de líbburus.
In su 2015 at rapresentau sa Sardigna in su festival de sa poesia "StAnza" – Scotland's international poetry" de sa tzitadi de St. Andrews in Scòtzia .
Partitzipatzionis a:
- Prémiu "Ozieri" in su 1993 e in su 1998
- Prémiu "Mialinu Pira" in su 1996
- Prémiu "Sant'Antoni de su 'ou" de Mamoiada in su 1993, 1994, 1995
- "Premio Internazionale di Milano" in su 1997, 2004, 2008
- Prémiu “Remundu Piras” in su 2008
- Prémiu “Peppino Mereu” in su 2009
- Prémiu "Città di Sassari" in su 2010.
- Prémiu “La terzina” (per la prosa) in su 1998.
Òperas
Su fragu 'e su entu, Tema, 1996.
Follas, Casteddu, Edizioni Frorias, 2003.
Bellebbatu - La parlata di San Basilio, Domus de Janas, 2009,
Luna Cantadora, in Nicola Tanda (a incuru de), La Biblioteca di Babele, Edes, 2010.
Lentores = Drosies = Rugiade, Soter, 20 austu 2019,
Alientu, 2004. (scenegiadura po su teatru)
Lionora, una visioni, 2007. (scenegiadura po su teatru).