SARDU
Comunu de Arresi: Lunis 27 de Argiolas 2020, a is noioras de a noti (h. 21.00), in pratza Nuraghe cun “Su connottu” torrat “Aspettando NurArcheoFestival” cun s’editzioni “Viaggio in Sardegna: Sulcis da scoprire”. Custa rapresentatzioni teatrali insertada in is propostas de s’Ufìtziu de Língua Sarda de su Comunu de Arresi, dda finantziat sa Regioni Autònoma de Sardigna cunformas a sa L. 482/99 “Normas in materia de amparu de is minorias linguísticas stóricas”. Po biri su spetàculu non si pagat. Po respetai is dispositzionis contras a sa spartzinadura de su Covid-19, s'intrada est cuntrollada e duncas tocat a si prenotai tzerriendi a su númunu: 3348821892.
Torrat “Aspettando NurArcheoFestival”, sa série de spetàculus chi tenint sa tarea de spartzinai sa partitzipatzioni a sa retza de is àreas archiológicas e de interessamentu stóricu paesagísticu chi bolint creai unu diàlogu biu cun su teatru. Su festival ddu organizat “Il Crogiulo” cun sa direzioni artística de Rita Atzeri.
Significativu sototítulu su de sa editzioni 2020, “Viaggio in Sardegna: Sulcis da scoprire”. Biaxi in Sardigna poita apustis de sa cuarantena e cun is limitatzionis e is dispositzionis contras a su Covid-19 ancoras in atu, eus crétiu chi un’agiudu cuncretu po torrai a fai partiri su tu turismu in s’Ísula, fiat su de ndi prumovi sa connoscéntzia puru intra de is abbitantis cosa sua. Sulcis de scoberri, poita is primu Amministratzionis a cunfirmai sa partitzipatzioni cosa insoru e a tenni sa fortza de organizai funt stétias cussas de Arresi e Teulada agiudadas de s’Assótziu Sarditinera.
Respetendi is normas de preventzioni contras a su Covid-19 s’intrada est cuntrollada e duncas po non fai ammuntonamentus, tocat a si prenotai a su númunu 3348821892.
Lunis 27 de Argiolas 2020, in Arresi, in pratza su Nuraghe, a is noioras de a noti (21.00) andat in scena “Su connottu”, unu cràssicu de su teatru sardu, scritu in su 1792 de su poeta, romanzieri e drammaturgu romanu Romanu Ruju e portau in scena prus de 300 bortas de sa coperativa “Teatro di Sardegna”.
A calicunu su nómini de Pasqua Selis Zau, connota cumenti a Paskedda Zau, non narat nudda, epuru est issa sa populana nugoresa, mamma, fiuda, de dexi fillus, chi su 26 de Abrili de su 1868 iat móviu s’avolotu populari contras a sa Lei de is Tancaduras (sa lei pregonada in su 1820 in s’interis de sa dominazioni sabbauda in Sardigna, chi autorizàt aa tancai is terrenus fintzas a cussu momentu cunsideraus, po costumàntzia, de propiedadi comuna, istituendi diaici sa propiedadi privada perfeta), candu is messajus e is pastoris si fiant chesciaus contras a sa detzisioni de su Cuntzillu Comunali de Nùgoro de privatizai is terras púbricas. Cussa rebbellia est passada a sa stória cumenti a “Su connotu”, de su tzérriu de Paskedda: “ A su connotu, torramus a su connotu!”, a sa costumàntzia.
In s’òpera de Ruju, arricada apustis de is cantzonis de Francesco Masala e torrada a scriri po sa scena de su regista Gianfranco Mazzoni, sa narratzioni dda svilupant pruscatotua is óminis. In su contu torrau a manixai de "Il Crogiulo" funt is féminas a donai boxi a su scritu: Rita Atzeri, Maria Grazia Bodio, Isabella Orchis, duas atoras stóricas de su "Teatro Sardegna", Gisella Vacca e su fisarmonicista Stefano Minnei.