SARDU
Comunu de Gùspini: Torrat pustis de duus annus de pàsiu su Carnovali Guspinesu. Su programma, chi dd’at cuncordau s’Assótziu Pro Loco e cun s’amparu de s’Amministratzioni Comunali, biit tres apuntamentus a merii “innui nci at a èssiri spàssiu meda!” cumenti si ligit in su giassu de s’Assótziu chi descriit aici su programma:
"Si cumentzat su Gióbia Lardajolu (16 de Friaxu) cun su Carnovali de is Pipius. At a essi una dii dedicada pruschetotu a is prus piticus cun spetàculus de maxia e giogus de fogu. Ddoi ant a èssiri puru giogus unfràbilis, giustu po no si fai a mancai nudda!
A indruciai su merii nci ant a pentzai su tzúcuru filau, is pop-corn e is tzípulas chi s’ant a cumbidai a totus.
Su 21 de Friaxu (Martis de Agoa), is “Cambas de Linna” ant a fai partiri sa sfilada de Pratza Oristano a is 5 de a merii (17.00). Ddus ant a acumpangiai sa genti mascarada a pei e sa truma guspinesa de “Is Casermettas”. A no fai mancai is energias nci pentzant is tzípulas chi sa Pro Loco at a preparai in pratza XX Settembre!
Dulcis in fundo, Carnevalinas! Sàbudu su 25 donat vida a unu grandu spetàculu de carrus allegóricus e trumas mascaradas chi ndi benint de su Campidanu de Mesu e de s’aristanesu. Sempri is Cambas de Linna ant a fai cumentzai is baddus a is 4 de a merii (16.00) in sa bia Anna Frank, portendi música e spàssiu peri bias de sa bidda, fintzas a lompi in sa pratza Togliatti, faciora de is 9 oras de a merii (21.00). Agradéssius meda s’assótziu culturali de Ula, “S’urtzu e sos bardianos” e su “Viking Group” de Casteddu, chi ant a partetzipai. Po ndi torrai a bogai a pillu una traditzioni antiga, a s’acabbu de sa sfilada s’at a abruxai su mustajoni “Gambetta”, e agoa s’ant a premiai is primus tres carrus e sa truma a pei prus bella.
S’acontéssiu si serrat cun unu spetàculu musicali stravanau".
Po is piessignus e informus in prus, o po agiorronnamentus apitzus de s’organizadura tocat a castiai in su giassu de sa proloco e in is pàginas social.