SARDU

Comunu de Sestu: Fonti:"La Gazzetta del Medio Campidano": Partendi de is launeddas, su strumentu prus antigu de sa mùsica popolari sarda, chi tenit originis preistoricas, inghitzat sa produtzioni noa de cuncertus de s’Assòtziu Culturali Musicale “Ennio Porrino” de Elmas. Cun “SONUS ANTIGUS DE SARDIGNA” ant aprontau unu tretu musicali chi pertocat sa mùsica de su connotu sardu propostu puru in forma cumparativa cun s’esecutzioni de branus modernus e contemporàneus. 

Sàbudu s’11 de làmpadas 2022 a is otu e mesu de a merì (20.30) ddoi at a essi in Sestu (in sa Crèsia N.S. de is Gràtzias) su Cuncertu a boxi e strumentus “Sonus antigus de Sardigna” innoi at a pigai parti su grupu Cuncordia a Launeddas (po contu de su Maistu Gianfranco Meloni) cun sa partetzipatzioni de Marianna Orrù (mesu sopranu) e Pasquale Perra (pianoforti). Sa “cuncordia”, in sa fueddada de is sonadoris de launeddas significat sonai impari. Una impostatzioni chi, mancai no siat una costumàntzia de sa mùsica sarda, tenit s’obietivu de avalorai e amanniai is potentzialidadis musicalis de is launeddas. Sa sonadura de is branus a manera traditzionali si fait cun s’ensemble de launeddas a assolu o a cuncordia. Su cuncertu (sa diretzioni artìstica est de su Maistu Ignazio Perra) dd’at organizau s’Assòtziu Culturali Musicali “Ennio Porrino” de Elmas cun sa collaboratzioni de s’Art&Show srl, cun su contributu de sa Regioni Autònoma de sa Sardigna – Assessorau de sa P.I., Benis Culturalis, Informatzionis, Spetàculu e Sport (intro de su progetu “Suoni e Voci per l’Isola- Sonus e Boxis po s’Ìsula” e de sa produtzioni, spartzinadura e circuitatzioni cuncertìstica chi s’Assòtziu est aprontendi in Sardigna in su 2022), impari a sa de otu Editzioni de sa Manifestatzioni “Atòbius, Festas e Traditzionis” (organizada de s’Assòtziu Culturali “Tam Tam” de Sestu impari a su Comunu de Sestu) e cun is festegiamentus in onori de Sant’Antoni de Padova (in collaboratzioni cun sa Parròchia N. S. de is Gràtzias de Sestu). S’intrada a su cuncertu, chi s’at a fai in su rispetu de is arrègulas contras su covid, at a essi a indonu.