SARDU
Comunicau po is giornalis: Ativatzioni Piataforma MLOL Sistema Bibliotecàriu "Monte Linas"
Su Sistema Bibliotecàriu "Monte Linas", a inghitzai de lunis 11 de Friaxu 2019, donat unu servítziu nou a is umperadoris iscritus in is bibliotecas de su sistema, chi incluit is comunus de Arbus, Gonnos, Gùspini, Pabillonis, Sant'Éngiu, Sàrdara e Biddacidru: sa piataforma MLOL.
Su servítziu donat sa possibbilidadi a is iscritus de ligi in sa retza rivistas e giornalis: in sa piataforma MLOL si podint castiai dónnia dí prus de 7000 giornalis de totu su mundu in versioni digitali. Is giornalis italianus, cumenti a su "Corriere della Sera", a "Il Sole 24 ore", a sa "Repubblica", e internatzionalis, cumenti a su "Washtington Post", a "The Guardian", a "Le Monde", e àterus milla, funt a dispositzioni de sa comunidadi, chi podit castiai is giornalis localis puru.
In prus si podint castiai puru, in versioni "on line", rivistas e setimanalis, cumenti a "Focus", a "Wired", a "Vanity Fair" e aici sighendi.
Po unus cantu giornalis nc'est puru sa versioni àudiu e sa tradutzioni de sa língua stràngia a sa italiana.
Is minoreddus puru podint gosai de su servítziu ma cun s'autorizatzioni de su babbu e sa mamma.
Po sa registratzioni, si cumbidant is tzitadinus e is tzitadinas interessaus a andai in is bibliotecas de su Sistema Bibliotecàriu "Monte Linas".
Fadei leturas praxilis!
Cuntatus