SARDU

Giauni: Su portali de sa língua sarda at a essi obertu fintzas a su mesi de Làmpadas de su 2019, ónnia lunis e cenàbara de is tres e mesu a is ses e mesu.

In su comunu de Giauni, pagu pagu po sorti ma de prus po sa faina bona de is aministradoris, ddoi est su portali de sa língua sarda. Sa sceda de importu po sa genti est ca is trabballus ant a sighiri po sa scoada de su 2018 e in su 2019 fintzas a su mesi de Làmpadas.
Is oràrius ant a essi sèmpiri is própius, su lunis e sa cenàbara a merii. Imoi chi seus torraus a s’ora de su soli nos’eus a biri de is tres e mesu a is ses e mesu.

Aguantei a notu ca su lunis est intregau a is pipius sceti, po ddus fai giogai cun sa língua. Is atividadis si faint in su Tzentru de Aggregatzioni Sotziali de su comunu, anca podeis agatai sa bibbrioteca etotu, cun aìnturu unu muntoni de líbburus.

Ma ita fait su portali de sa língua sarda?
Trabballat a innantis de totu po s’apretu de sa genti de su comunu a médiu de cursus de formatzioni anca si podit imparai prus mellus sa gramàtica de sa língua sarda o simpli po consuléntzias linguísticas, aparíciat atividadis po pipius, est a s’afrísciu de su comunu po fainas de furriaduras de àutus ufitzialis de ponni in su giassu istitutzionali, podit povintzas apariciai atóbius po spainai e amanniai is connoscéntzias chi pertocant sa língua e sa curtura de sa Sardínnia. Est unu trabballu mannu e spantosu totu aingíriu de sa língua sarda.

Totu is atividadis de is portalis de sa língua sarda de sa Províntzia chi imoi ddi nant de su “Sud Sardegna” ant a essi postas a campu aìnturu de su giassu nou pesau de sa Províntzia etotu, www.limbasardasudsardigna.it.

Po sa primu borta unu giassu de un’enti púbbricu sardu  at a essi totu in sardu, cun sa possibbilidadi de ddu ligi in italianu etotu po is chi funt acostendisì torra a sa língua.