SARDU
Comunu de Casteddu: Fonti: L'Unione Sarda - Si ndi scidant oramai de noi annus, ammostendi a is abbitantis cosa sua etotu una Sardigna chi pagus connoscint e organizendi una festa, si iat a podi nai una fiera, chi iat a costai una surra de dinai: si non fiat chi dda faint setanta voluntàrius chi trabballant a gratis.
“Scirarindi”, cras e domínigu 24 de is 10 de a mengianu fintzas a is dexi de a noti (10.00 – 22.00), portat 280 espositoris in is localis de sa Fiera in arburada Diaz, innui funt is espositzioni: prodotus, servítzius e connoscéntzias dedicaus a su benéssiri, a su bivi beni, a sa sustenibbilidadi ambientali, agrupastorali, económica e sotziali. Un’atóbiu chi, ocannu passau, at portau cuindiximilla pessonas.
Programma mannu meda
Impossíbbili a fai un’elencu de ita ddoi at a “Sciradindi”, tanti est arricu su programma, mancai sa mancàtzia de sustenidoris privaus e púbricus. Sa proposta si apoderat in peis, a parti chi con su trabballu a indonu de is voluntàrius, po médiu de is 5 o 6 éurus de su billetu (ddu pagant scéti is stràngius de is 16 a is 65 annus, is àterus no). Giovannella Dall’Ara, Presidentissa de s’assótziu “Scirarindi”, arrannescit ancoras a si cummovi sprichendi is propostas: bessidas, “cooking show”, ammustas, bioedilítzia, ecoturismu, agri-cultura, ambienti, economia ètica, artesania, logu compra-naturali, partitzipatzioni, animalis, saludi e benéssiri, alimentatzioni e tantis àterus primoris sardus prodúsius de aziendas piticas. Su programma cumpretu est in: festival.sirarindi.org; sexi pàginas cracas de propostas, unas cantu diaderus interessantis. Cumenti a dónniannu, un’atentzioni particulari est dedicada a is fémminas, pruschetotu si funt mammas.
Tarea de sa rassínnia
“In sustàntzia contaus sa Sardigna po médiu de pessonas beras chi faint cosas beras” spricat dall’Ara. Is esposidoris de una certa mannària e is aziendas pagant su logu calincunu éuru in prus, in manera chi is realidadis piticas e is assótzius ( a esémpiu, is chi agiudant is animalis bagamundus a spesas cosa insoru) potzant essi a indonu in custa birdiera oramai bessida natzionali. Ddoi at de totu: de s’esperiéntzia de s’Ortu Sotziali de su presoni de Uda (portada de Don Marco Lai, cabu de sa Caritas Diocesana) a is artis martzialis, e ancora logus po is fémminas cun prus de 50 annus, una trentina de stràngius in is dibbatidus, ecoturismu e bessidas puru: domínigu a is ses e binti de a mengianu (6.20) , (su títulu Scrirarindi dd’ant intzertau) cussa a sa “Sella del Diavolo”, àteras si faint in bitzicreta. Est una festa fata cun pagu dinai e chentza sustenidoris chi ammostat chi a bínciri funt is bideas: de custu, nd’est cumbinta po primu sa Presidenti Dall’Ara.