Comunu de Igrèsias: A cumentzai de cenàbara 22 de gennàrgiu 2021 si podint torrai a bisitai is situs mineràrius de Porto Flovia, Gruta de Santa Bràbara e si podit fai su tour esternu de sa Miniera de Santu Giuanni. Torrat a oberri s'enna fintzas su Museu de su Costumu e de sa Traditzioni

Comunu de Igrèsias: S’Ufìtziu Turìsticu Comunali, cunsiderendi su sutzessu mannu chi at tentu s’initziativa in su perìodu de is festas, torrat a organizai is bìsitas a in su Campusantu Monumentali. Is bìsitas, chi ant a durai un’ora e cuartu, incumentzant a is 09:00 e a is 10,30. S’atòbiu est in sa geca principali de su campusantu in via Cappuccini e costant € 5 a persona ma funt in donu po is pipius finas 10 annus. Torraus gràtzias a tziu Gianni Persico po si ai lassau umperai sa fotografia.

Comunu de Domusnoas: Lunis 11 de gennàrgiu at torrau a incumentzai su servìtziu de imprèstidu e torrada de is librus in sa biblioteca Comunale “Gesualdo Pellegrini”. Su servìtziu funtzionat po apuntamentu. Is utentis po scioberai is librus depint castiai su catàlogu OPAC in sa retza opuru podint telefonai diretamenti a is operadoris o ancora podint mandai una "e-mail".

Comunu de Santu Giuanni Suergiu: S'Amministratzioni Comunali fait sciri chi de su 4 de gennàrgiu est ativu su su servìtziu de imprèstidu e de 'intrega a domicìliu de is librus prenotaus in sa biblioteca comunali.Custu servìtziu est portau a innantis gràtzias a sa collaboratzione pretziada de s'AUSER de Santu Giuanni Suèrgiu.

Comunu de Biddacidru: Fonti: "Sardiniapost": Giuditta Sireus, fundadora de su Círculu Literàriu "Jane Austen Sardegna", est sa "Donna al traguardo" de su 2020.

Comunu de Frùmini Majori: Si fait sciri ca lunis 11 de gennàrgiu torrat a oberri sa biblioteca comunali. Sa biblioteca est oberta su lunis e su cenàbara de is 4 a is 6 de merì, su mèrcuris a mengianu de is 10:00 a is 12:00.

Comunu de Mara Arbarei: Fonti: "La Gazzetta del Medio Campidano": S'annu passau, mancai is limitatzionis po nexi de su covid, s'assótziu locali Ichnos, costituidu pagus annus a oi de artistas de Mara Arbarei, at acabbau ses muralis in bidda. Su trabballu dd'at apogiau s'Amministratzione Comunale chi agiudat is propostas de is tzitadinus privaus po melliorai su decoru in is fatziadas de is domus.

Comunu de Biddanoa de Forru: Fonti: "Làcanas": Su cumplessu nuràgicu Genna Maria, in Biddanoa de Forru, in su Sud de s’Ìsula, cun is turris suas e su villàgiu est una de is testimoniàntzias prus arricas e importantis de sa tziviltadi nuràgica in Sardigna. S’agatat a pagus chilòmetrus de sa bidda, asuba unu cùcuru a 408 metrus asuba su livellu de su mari, ma sa straordinariedadi sua no est sceti su panorama fantàsticu de innói si bit puru su   Golfu de Aristanis e su Golfu de Casteddu: fiat nàsciu cumenti a puntu stratègicu de innói si dominànt is bias po intrai in sa Marmidda.