Comunu de Biddacidru: Fonti: L'Unione Sarda: Tzínema de primori po su períodu de Paschixedda in Biddacidru puru. Ddu proponit sa rassigna "Villacidro Film Festival" chi si fait su 21 - 23 - 26 - 28 - 30 de Meseidas in sa sala de stúdiu de sa Mediateca Comunali "F. De André". Totus is apuntamentus funt a indonu e inghitzant a is ses de a merí (18.00).

Comunu de Pabillonis: Fonti: La Gazzetta del Medio Campidano: Sa Consulta de is Gióvunus de Pabillonis e s'assótziu "Promos", po su períodu de Paschixedda, tenint unu progetu nou: "Escape of Xmas". Is cuncurrentis acorraus in aposentus amaniaus cunformas a s'argumentu, depint circai sa manera de bessiri aintru de 60 minutus, risolvendi códixis, enigmas, segamentus de conca e intzertus.

Comunu de Samassi: Su 18 de Meseidas 2019, a is ses de a merí (18.00) in sa Biblioteca de Samassi nc'est sa presentada de su líbburu "L'ultimo giorno di Primavera" de Daniele Mocci. Sterrit is trabballus e fueddat cun s'autori Andrea Pau Melis scritori e scenegiadori.

Comunu de Carbònia: Crasi, 18 de Meseidas 2019, sa tzitadi de Carbònia fait  81 annus. Po afestai in sa mellus manera custa recurréntzia de importu, sa "Cooperativa Sistema Museo"at organizau duas abbisitas guidadas a sa tzitadi.

Comunu de Santu Antiogu: Un'àteru passu a innantis faci a s'amparu de s'Ambienti: Su Comunu de Santu Antiogu bessit "Plastic Free". Su Síndigu Ignazio Locci, difatis, at firmau s'ordinàntzia n.21 de su 2 de Meseidas 2019 "Dispositzionis po torrai a nudda s'àliga, afortiai s'arragorta diferentziada e sa smenguadura de su dannu de sa pràstica asuba de s'ambienti. Proibbidura de bendi e de umperai sachitas, cuntenidoris e pratus chi non si podint sperdi - Santu Antiogu Comunu Líbberu de sa Prastica ("Plastic Free").

Comunu de Santu Antiogu: Cenàbara 20 de Meseidas, nc'est sa presentada de su líbburu "Il Paese dei Cuori" a sa preséntzia de is autoris, Dot. Roberto Tumbarello e sa Dot.ra Sabrina Montis. Non est fàtzili spricai a is pipius is cardiopatias cungénitas (difetus averiguaus fatuvatu in su períodu innantis de sa nàscida) , ma su diretori de su repartu de Cardiologia Pediatrica de s'Azienda Spidaliera G. Brotzu de Casteddu, Dot. Tumbarello e is chi trabballant cun issu nci funt arrannéscius.

Comunu de Pabillonis: Fonti: La Gazzetta del Medio Campidano: In ocasioni de is festas de Paschixedda, s'Amministratzioni Comunali de Pabillonis, imparis cun is assótzius, sa parróchia, is atividadis produtivas, is artesanus e is obbistas localis, at programmau una lista longa de acontéssius. Aberrit is manifestatzionis sa presentatzioni de su  romanzu de Stefano Cruccas "Il Canto del Nuraghe", chi si fait su 13 de Meseidas.

Comunu de Gùspini: "L'Adolescenza tra ribellioni e silenzi", cuferéntzia educativa chi interessat a  is babbus e mammas e a  totu sa comunidadi educanti, a incuru de su "Centro Crea" , condúsia de Lorenzo Braina. Sa cuferéntzia educativa arrexonat de is crisis evolutivas  mannas e piticas chi su piciocheddu e sa famíllia cosa sua podint passai.