Comunu de Arresi: Lunis 27 de Argiolas 2020, a is noioras de a noti (h. 21.00), in pratza Nuraghe cun “Su connotu” torrat  “Aspettando NurArcheoFestival” cun s’editzioni  “Viaggio in Sardegna: Sulcis da scoprire”. Custa rapresentatzioni teatrali  insertada  in is propostas de s’Ufìtziu de Língua Sarda de su Comunu de Arresi, dda finantziat sa Regioni Autònoma de Sardigna cunformas a sa L. 482/99 “Normas in materia de amparu de is minorias linguísticas stóricas”. Po biri su spetàculu non si pagat. Po si prenotai tocat a telefonai a su númunu: 3348821892.

Comunu de Igrèsias: Si fait sciri a totus ca in su Comunu nostu at torrau a incumentzai s'atividadi de Ufìtziu po sa Lìngua Sarda. Custa initziativa est incarrerada de su Comunu de Igrèsias in pari a sa Provìntzia de su Sud Sardigna gràtzias a sa L. 482/99 – amparu de is minorias linguìsticas (annualidadis 2018-2019).

Comunu de Carbònia:  In su Comunu nostru inghitzat s'atividadi de Ufìtziu de Lìngua Sarda. Custa initziativa est incarrerada de su Comunu de Carbònia in pari a sa Provìntzia de su Sud Sardigna gràtzias a sa L. 482/99 – amparu de is minorias linguìsticas (annualidadis 2018-2019).

Comunu de Gonnesa:  In Prag’e Mesu ant incumentzau s’atividadi s’infopoint point turìsticu e su servìtziu de biblioteca chi funt ativus finas a su 30 de Austu. S’infopoint ddu gestit su “Consorzio Turistico per l’Iglesiente” e donat informatzionis a is turistas a pitzus de is situs de su territòriu.

Comunu de Narcau: De su 13 de mesi de argiolas at torrau a oberri a su pùbblicu sa biblioteca comunali de Narcau. Sa biblioteca est oberta a merì su lunis e su mèrcuris de is 4 a is 7, su cenàbara a mengianu de is 9 a mesudì.

Comunu de Santu Giuanni Suergiu: Cun prexeri mannu cumbidaus totus is pipius in edadi prescolari, acumpangiaus de su babu o de sa mama, a pigai s’apuntamentu po benni a biblioteca in bia Mazzini, po pigai su calendàriu/bibliografia “Nati per leggere 2020” e is cofineddus po is pipius nàscius intra de su mesi de làmpadas 2019 e làmpadas 2020.

Comunu de Frùmini Majori: Ant torrau a oberri a is bisitadoris is grutas de Su Mannau. Po imoi funt previstas 5 bìsitas dònnnia dii chi ant a incumentzai a is: 10:15; 11:30; 12:45, 15:30, 16:45. S'at a donai prioridadi a is prenotatzionis (3475413624 o sumannau@tiscali.it) ;

Comunu de Nuxis: Custa cida chi benit is archeòlogus ant a torrai a Tatinu po donai inditus a s’Amministratzioni Comunali chi tenit giai 30,000 èurus prontus po ndi bogai sa crobetura arruta e po studiai solutzionis alternativas po amparai su tèmpiu nuraghesu dedicau a su cultu de is àcuas.