Comunu de U Pàize: S'editzioni de su 2020 de Girotonno est intra de is primus acontéssiu tzertificaus in Regioni Sardigna. Cenàbara 6 de Meseidas 2019, de is tres a is ses de a merí in sa sala de su ExMe nc'est su "Workshop" dedicau a s'inghitzu de is trabballus de su GIROTONNO 2020. Totus is operadoris turísticus, is posaderis, is referentis de is assótzius culturalis, is ghias, is operadoris de servítzius, e totu sa comunidadi est cumbidada a pigai parti a su "workshop", po si cunfrontai asuba de is propostas chi permitint un' avaloramentu prus mannu de is aspetus ambientalis e sotzialis e de prumotzioni de su territóriu.

Comunu de Biddacidru: S'Assessorau a sa Cultura de su Comunu de de Biddacidru at organizau unu merí spassiosu in cumpangia de Gigi Tatti chi presentat su líbburu cosa sua: "Scracàlius. Barzelletas in língua sarda". S'acontéssiu est su 6 de Meseladàmini 2019 in su "Caffe Letteràrio".

Províntzia de su Sud Sardigna: Sa Províntzia de su Sud Sardigna cumbidat totus is assótzius culturalis chentza iscopu de lucru, chi in is úrtimus tres annus (2016 - 2018) ant fatu atividadis in su setori de sa Língua e Cultura Sarda,a partitzipai a custu bandu po s'assignatzioni de is cuntribbutus, cunformas a sa L. 482/99, po s'annualidadi 2018. Is domandas depint lompi aintru de su 13 de Meseidas 2019 a s'indiritzu: pec protocollo@cert.provincia.sudsardegna.gov.it

Comunu de Carbònia:Sàbudu 30 de Donniasantu, a is noioras mancu cuartu de a noti (20.45), Michela Sale e Tiziana Troja, prus connotas cumenti a  "Le Lucide" de sa Cumpangia "Lucido Sottile", funt protagonistas de sa cummédia scundida contras a is discriminatzionis de géneri "La Conosci Giulia?".

Comunu de Mara Arbarei - Is pratzas: Fonti: La Gazzatta del Medio Campidano: Duus is atóbius in dís de sàbudu 30 de Donniasantu e domínigu 1 de Meseidas 2019 po is amantiosus de stória mediuevali. In Mara Arbarei e in Is Pratzas difatis est in programma un'acontéssiu chi permitit de torrai a scoberri unu mundu chi at donau medas elementus de interessamentu siat artísticus chi alimentaris in totu s'Ísula.

Comunu de Igrèsias: Si fait sciri a totus ca in su Comunu nostru at obertu po sa prima borta s'Ufìtziu po sa Lìngua Sarda. Duncas fintzas a su mesi de maju chi benit, dònnia martis, in sa Biblioteca Comunali ddoi at a èssiri unu operadori po agiudai e collaborai con totus is chi bolint chistionai e iscriri su sardu o sciri novas asuba de sa lìngua nosta.

Comunu de Biddacidru: Fonti: La Gazzetta del Medio Campidano: Si intítulat "Il profumo del passato" su líbburu scritu de su cirdesu Mauro Salis chi contat unu biaxi in sa stória e in is costumàntzias de una Sardigna giai scaréscia. Su líbburu ddu presentant in Biddacidru su 30 de Donniasantu in su palàtziu de s'Obispu in bia Vittorio Emanuele n.15, a in cincu e mesu de a merí (17.30).

Comunu de Nuràminis: Atóbiu de importu cenàbara 29 de Donniasantu 2019, nc'est sa cuferéntzia de presentada de su Progetu "Itinerario Archeologico tra Nuraminis e Villagreca" annualidadi 2019.Ddoi at comunicatzionis de importu asuba de is arresurtaus de is sgavus fatus in sa Tumba Bizantina.